VOV4.Jarai -  Čơtlăm lơ 30/8, ƀơi ƀôn prong Hồ Chí Minh, Kơ-iăng Khua dêh čar ta ơi Vũ Đức Đam gum hrom Grŭp hyu mă bruă pha ra mơng Kơnuk kơna kơ ngă tui pơgang, pơgăn klin Covid-19 hmâo pel ĕp laih bruă pel ĕp, pơpha brơi ia jrao pơjrao kơ mơnuih ƀă kơman Covid-19 glăk dô̆ čơlah, pơjrao ƀơi sang. Tơdơi kơ pel ĕp ƀơi quận 11 hăng quận 8, Kơ-iăng Khua dêh čar ta ơi Vũ Đức Đam pơtă bôh nik phrâo rơgao ƀơi hơdôm anih anom hmâo hơdôm mơnuih F0 hơdai nao ruă kraih tañ biă, samơ̆ ƀu dưi pel ĕp lăng, thâo tañ anun djai ƀơi sang. Yua anun, pơ ala kơ kơnong kơ iâu telephone, khul ơi ia jrao ling tơhan khom gum hrom hăng bruă ia jrao anih anom anun na nao ƀơi anăp nao pel ĕp kơ pô F0, biă ñu lĕ hơdôm bôh sang anô̆ ƀu hmâo mơnuih hlăk ai, suaih pral bơwih brơi kơ mơnuih ruă. Kơ-iăng Khua dêh čar ta rơkâo amăng sa hrơi mlăm pơ̆ anăp, khul ơi ia jrao ling tơhan khom tum pơƀut, lăi pơthâo glăi tơlơi pha brơi jrao pơjrao kơ F0. Tơdah hmâo jrao samơ̆ akă dưi nao truh ƀing F0 thơ khom ba nao mơtăm, tơdah kơƀah khom blơi pơhrua nao mơtăm./.

Siu H’ Prăk: Pô pơblang