VOV4.Jarai-Kơ-iăng Khua dêh čar ơi Lê Văn Thành git gai jơnum lăng nao rai mơ̆ng ataih, pơƀuh ƀô̆ mơta amăng tivi pơčrông sai kơčăo bruă pơkra jơlan rơdêh đuăi hmar mơ̆ng kual Kơdư nao pơ Dơnung jơlan gah Ngŏ mơ̆ng thun 2017-2020. Pơhiăp ƀơi mông jơnum, Kơ-iăng Khua dêh čar ơi Lê Văn Thành brơi thâo, anai lĕ ring bruă phun mơ̆ng dêh čar amăng 5 thun pơ anăp, Ding jum kơđi čar git gai khom gleng nao djop pran jua, mơnuih mơnam pioh ngă bruă anai.

Kơ-iăng Khua dêh čar ơi Lê Văn Thành lăi lĕ, hơdôm tơlơi tơnap tap, gun gan amăng rơnoh gơnam tam, anih mă pơtâo, čuah khom pơsir hmao kru. Kơ-iăng khua dêh čar pơtrun hiăp djop ding jum, tơring čar khom pơtrut khua mua anom bruă sĭ mơdrô pơdjơ̆ nao khom pơsir hĭ anŏ dŏ gun ƀơi jơlan nao kah hăng gong apui lơtrik, sang bruă, đing ia, hrĕ dăng kông. Hăng kơčăo bruă prăp lui pok pơhai, Kơ-iăng Khua dêh čar rơkâo ding jum Jơlan glông nao rai hăng pơdŭ pơgiăng ruah mă pô anom bruă pơpă tuh pơ alin ba gru hlâo ngă tui hơdră bruă anai, anăm ôh pioh kơ gơnong dlông pơtum abih pran jua gơnam mă bruă laih samơ̆ ring bruă ƀu hơmâo pơphun mă bruă.

Nay Jek: Pơblang