VOV4.Jarai-Ƀrô hơdor glăi 91 thun Hrơi gru grua Anom bruă djop djuai ania mơnuih mơnam Việt Nam lơ 18/11, tlam mơmŏt lơ 15/11, Khua anom bruă pơgăn tơlơi soh ƀong kông ngăn dêh čar, ơi Phan Đình Trạc nao čuă ƀut plơi mrô 3 Phan Chu Trinh, phường 9, plơi prong Đà Lạt, Lâm Đồng. Anai lĕ, ƀut plơi blung a mơ̆ng plơi prong Đà Lạt dưi hơmâo Jơnum min djop djuai ania mơnuih mơnam Việt Nam Lâm Đồng ruah mă pơsit plơi pla ba gru hiam.

Khua anom bruă pơgăn tơlơi soh ƀong kông ngăn dêh čar nao ƀơk gơnam kơ

 mơnuih ƀôn sang ƀut plơi mrô 3

Ơi Phan Đình Trạc čih pioh hăng bơni hơdôm boh tơhnal mơ̆ anom bruă ping gah, gong gai kơnuk kơna, khul wai lăng djop djuai ania mơnuih mơnam pơ anai dưi ngă thun blan rơgao. Biă mă ñu boh tơhnal djru nao rai pơđĭ kyar bơwih ƀong huă, găn rơgao tơlơi tơnap tap ƀơi anăp kơ klin kheng Covid 19 ƀă hyu hăng djă bong kjăp anăn plơi pla ba gru hiam.

Khua anom bruă pơgăn tơlơi soh ƀong kông ngăn mơ̆ng dêh čar ta ơi Phan Đình Trạc čang rơmang mơnuih ƀôn sang ƀut plơi mrô 3 Phan Chu Trinh ăt gum pơgôp nao rai, pơđĭ tui kơnuih hiam mơnuih ƀôn sang Đà Lạt muih, rơ-un, rơnang, thâo jum tuai. Ƀrô djơ̆ tal anai, ơi Phan Đình Trạc hơmâo ƀơk gơnam kơ ƀut plơi mrô 3 Phan Chu Trinh, Jơnum min wai lăng djop djuai ania mơnuih mơnam Việt Nam, tơring čar Lâm Đồng hăng plơi prong Đà Lạt laih anun ƀơk gơnam kơ 7 boh sang anŏ hơmâo anăn kơnuk kơna djru hăng 5 boh sanganŏ ba gru hlâo hiam klă.

Nay Jek: Pơblang