VOV4.Jarai - Hơdor glăi 75 thun Hrơi đơ đam dêh čar blah ayăt lơ 19/12, mơguah lơ 17/12, Grŭp khua pơ ala ƀôn prong Hà Nội nao pơpŭ bơnga ƀơi Gŏng kut “Khom rơngiă kiăng lon ia hơdip”, đang bơnga Hàng Đậu, phường Quán Thánh, quận Ba Đình. Lơ 19/12 75 thun hlâo adih, anăp nao Tơlơi iâu pơthưr Đơ đam lŏn ia kơdŏng blah ayăt mơng Khua mir sir Hồ Chí Minh, khul ling tơhan hăng mơnuih ƀôn sang Hà Nội hmâo yơr đĭ laih khăn gru “Khom rơngiă kiăng lŏn ia hơdip”, pơplih rim črăn ƀôn prong, rim sang jing anih kơđăp blah, pok pơhai bruă blah mơng mơnuih ƀôn sang, abih bang mơnuih ƀôn sang blah ayăt. Pơpŭ bơnga ƀơi Gong kut “Khom rơngiă kiăng lŏn ia hơdip” – gru pơđom pioh bruă blah sông kơtang mơng khul ling tơhan hăng mơnuih ƀôn sang plơi prong jưh jom amăng 60 hrơi mlăm djă kŏng tơkai ayăt Prang rơnuč thun 1946, akô̆ thun 1947, khua ƀôn prong pơdah pran jua thâo tơngia pran jua gum hơgôp, tơlơi tuh rơyuh pran jua mơng hơdôm rơnuk nao hlâo, ƀing ling tơhan, neh wa hmâo ngă jing laih gru grua, jing pran ư-ang mơng djop mơnuih Hà Nội ră anai hăng tơdơi anai. Khua ƀôn prong pơsit pran jua git gai Ping gah, gong gai, ling tơhan hăng mơnuih ƀôn sang Hà Nội ngă tui dong gru grua gum hrom hơbit, gum pran, gum jua pơdŏng hăng pơđĭ kyar plơi prong jưh jom djơ̆ hăng bruă mă lĕ anom phun bruă kơđi čar - mă bruă lŏn ia mơng đơ đam dêh čar ta./.

Siu H’ Prăk: Pơblang