VOV4.Jarai - Tlam hăng mơmŏt (18/11), Ding kơna khul apăn bruă Ping gah dêh čar, Khua čih pioh Ƀirô Khua pơ ala mơnuih ƀon sang dêh čar, Khua anom bruă Khua pơ ala mơnuih ƀon sang dêh čar ơi Bùi Văn Cường hrŏm hăng grup hyu mă bruă hơmâo nao Jơnum hrơi gum pơgôp djop djuai ania hăng neh met wa djuai ania Bahnar, ƀơi plơi Đăk Wớt Yốp, să Hơ Moong, tơring glông Sa Thầy hăng mă bruă hăng Ping gah tơring čar Kontum.

Đĭ pơhiăp amăng mông bưp, Khua čih pioh Ƀirô Khua pơ ala mơnuih ƀon sang dêh čar čang rơmang neh met wa tŏ tui pran gum pơgôp, ngă tui klă hơdôm tal pơtrut pơsur hăng hơdôm tal pơplông khăp kơ lŏn ia kiăng kơ gum hrŏm pơđĭ kyar bơwih ƀong huă pơplih tơlơi hơdip mơda. Amăng mông mă bruă hăng Ping gah tơring čar Kontum, Khua čih pioh Ƀirô Khua pơ ala mơnuih ƀon sang dêh čar ơi Bùi Văn Cường pơdah pran hok mơ-ak hăng hơdôm tơlơi pơplih prong prin amăng bơwih ƀong huă, gru grua, mơnuih mơna amăng tơring čar Kontum amăng hơdôm hrơi giăm anai. Tơlơi anai pơdah rơđah hloh amăng hrơi jơnum tum pơƀut mơ-ak amăng hrơi gum pơgôp djop djuai ania glăk pơphun djop plơi pla ala ƀon amăng tơring čar. Khua čih pioh Ƀirô Khua pơ ala mơnuih ƀon sang dêh čar ơi Bùi Văn Cường hơmâo jao kơ tơring čar Kontum 1 klai prăk djru brơi tơring čar pok pơhai bruă pơgang klin Covid-19 hăng 5 boh sang gum pơgôp djop djuai anai hăng nua ñu 250 klăk prăk.

Siu Đoan: Pơblang