VOV4.Jarai - Amăng mông Jơnum Kơnuk kơna tui tơđar blan 11/2021 pơphun mơguah lơ 2/12 ƀơi ƀirô mă bruă Kơnuk kơna, Khua dêh čar ta ơi Phạm Minh Chính rơkâo amăng krah blan 12 phun ñu ngă giong bruă tlâ̆o vaccine ară tal 2 kơ mơnuih mơng 18 thun truh kơ tha, khom đing nao tlâ̆o brơi kơ čơđai mơng 12 thun hăng prong hloh kơ 12 thun kiăng čơđai pơwot glăi sang hră klă hăng hmâo kơčăo bruă rơđah pioh pok pơhai tlâ̆o ară tal 3. Pơhiăp amăng mông klah čun mông jơnum, Khua dêh čar ta ơi Phạm Minh Chính črâo rơđah, klin ruă truh ră anai phun ñu dưi wai lăng amăng đơ đam dêh čar, yak blung a djơ̆ hăng tơhnal ba tơbiă, dưi pơjing pran đăo gơnang hăng tơlơi mơ-ak kơ mơnuih ƀôn sang, anom bơwih ƀong hơkrŭ glăi pơđĭ kyar bơwih ƀong. Gah bruă mă pơ̆ anăp anai, Khua dêh čar ta rơkâo hơdôm ding jum, gơnong bruă, tơring čar, ƀôn prong thâo kơjăp dong, pơkă lăng hlâo klă tơlơi, biă ñu klin Covid-19; gir ngă tui “ngă juăt pơhlôm, pơplih tañ, wai lăng ba glăi bôh tơhnal klin Covid-19” tui Tơlơi pơtrun pơsit 128 mơng Kơnuk kơna./.

Siu H’ Prăk: Pô pơblang