VOV4.Jarai - Tlam lơ 15/9, Khua dêh čar ta ơi Phạm Minh Chính git gai Jơnum abih bang “Ƀing rơgơi kơhnâo boh thâo ia rơgơi măi mok Việt Nam pơphun ngă tui Tơlơi pơtrun Jơnum Ping gah dêh čar tal 13”. Pơhiăp ƀơi mông jơnum, Khua dêh čar ơi Phạm Minh Chính pơ ala kơ Khua mua Ping gah, Kơnuk kơna bơni kơ hơdôm tơlơi gum pơgôp prong prin mơng ƀing rơgơi kơhnâo boh thâo ia rơgơi măi mok, mơng lu rơnuk mơnuih rơgơi kơhnâo amăng dêh čar, mơng Khul pơlir hơbit mơnuih rơgơi kơhnâo boh thâo kĭ thuâ̆t Việt Nam.

Khua dêh čar bơni kơ tơlơi gum djru prong mơng mơnuih rơgơi kơhnâo boh thâo ia rơgơi.

Pơ anăp anai, ƀơi rŏng lŏn tơnah ăt bưp lu mơn tơlơi glêh tơnap, klin Covid-19 amra ngă sat kơtang tui kơ tơlơi bơwih ƀong ƀơi rŏng lŏn tơnah, amăng kual, amăng anun hơmâo dêh čar ta. Khua dêh čar kiăng: “ƀing ta khŏm gir hloh dong, gum pơgôp hloh dong đah mơng dưi ngă truh kih Tơlơi pơtrun Jơnum Ping gah dêh čar tal 13. Hăng tơlơi gơgrong ngă anom bruă pơ ala kơ mơnuih rơgơi kơhnâo boh thâo măi mok, Khul mơnuih rơgơi kơhnâo hăng hơdôm anom bruă ding kơna kiăng ngă klă hloh dong bruă kơđi čar, akŏ pơjing khul mơnuih gum pơgôp đah mơng dưi ngă truh kih djŏp bruă dêh čar ta gơñăm nao amăng hrơi blan pơ anăp”.

Siu H’Mai: Pơblang