VOV4.Jarai-Klăm mơmŏt lơ 23/11,  tui mông Việt Nam, ƀrô tal nao čuă dêh čar Japan, Khua dêh čar ơi Phạm Minh Chính hơmâo bưp mơnuih thâo hră, ƀing kơhnâo kơhnăk Việt Nam ƀơi Japan. Ƀơi mông bưp, lu mơnuih kơhnâo kơhnăk, ƀing mơnuih kơsem min boh thâo ia rơgơi lăi pơthâo hăng khua dêh čar hơdôm gơnam hơmâo pơkra ming, kơsem min, boh tơhnal phrâo amăng bruă điện tử, apui lơtrik pơkra mă yua glăi, bruă ia jrao, boh thâo ia rơgơi tơlơi pơmin pơčeh phrâo.....

Pơpŭ mơak hrom hăng tơlơi pơmin ia rơgơi Việt Nam, laih dơ̆ng lăi pơthâo hlâo hăng ngă hră rơkâo blơi glăi boh tơhnal pơmin pơčeh phrâo ia rơgơi mơ̆ hlăk  kiăng mă yua ră anai. Khua dêh čar kiăng ƀing mơnuih rơgơi kơhnâo Việt Nam ƀơi dêh čar Japan ăt gir run kơsem min, hơmâo lu hơdră ba glăi boh tơhnal tŭ yua kơ ană mơnuih, mă yua tơlơi pơtruh nao rai amăng bruă kơsem min boh thâo ia rơgơi mơ̆ng rŏng lŏn tơnah, ba ia rơgơi tơlơi kơhnâo, pran jua mă bruă ngă hrom hăng Japan laih anun boh tơhnal kơsem min kơplah wah Việt Nam hăng Japan glăi yua ƀơi dêh čar.

Ăt amăng klăm mơmŏt lơ 23/11, Khua dêh čar ơi Phạm Minh Chính hơmâo bưp mơnuih ƀôn sang Việt Nam dŏ hơdip mơda, mă bruă, hrăm bruă, hrăm hră ƀơi Japan; Khua dêh čar lăi, Ping gah, Kơnuk kơna ngă gêh gal amuñ hloh kơ mơnuih ƀôn sang Việt Nam dŏ pơ dêh čar tač rơngiao glăi gum hrom man pơdong hăng pơđĭ kyar lŏn ia.

Nay Jek: Pơblang