VOV4.Jarai-Anom bruă Kơnuk kơna phrâo hơmâo hră pơtrun ba hiăp git gai mơ̆ng Khua dêh čar ơi Phạm Minh Chính kơ bruă brơi pel ĕp tong ten kman phrâo anăn Omicron mơ̆ng drơi kman virus Sars-cov-2 kơtang tui, ƀă hyu hmar hloh ƀơi lu dêh čar amăng rŏng lŏn tơnah.

Kiăng prăp lui klă bruă pel ĕp, pơhlôm, pơgang klin, Khua dêh čar ơi Phạm Minh Chính pơtrun hiăp kơ Ding jum ia jrao khom pel ĕp tong ten anŏ pơblih drơi kơtang mơ̆ng kman phrâo anăn Omicron ngă rai; khom tơña na nao hăng anom bruă khul ia jrao rŏng lŏn tơnah kiăng thâo tañ kơ tơlơi pơhing, hmao kru, djơ̆ tong kơ anŏ pơblih drơi kman anai, mơ̆ng anun thâo krăn tong ten pơkra hơdră pơhlôm, pơgang tŭ yua hăng kman phrâo anai.

Ding jum ia jrao, Ding jum pơtom hiăp, Ding jum jơlan glông hăng pơdŭ pơgiăng, Ding jum kông an, Ding jum ling tơhan hăng hơdôm ding jum, anom bruă pơkŏn amăng kơnuk kơna tui hluai bruă mă, tơlơi dưi mơ̆ng pô khom pel ĕp tong ten mơnuih mut tơbiă mơ̆ng dêh čar tač rơngiao sit ƀuh mơnuih ƀă kman phrâo Omicron mut rai pơ Việt Nam khom pơgăn khut khăt kman anai mut ƀă amăng dêh čar ta.

Nay Jek: Pơblang