VOV4.Jarai-Anom bruă kơnuk kơna phrâo mơ-it hră pơtrun brơi djru mơnuih mă bruă ia jrao pơhlôm, pơgang klin Covid 19, truh pơ Khua Ding jum ia jrao, Khua Jơnum min mơnuih ƀôn sang tơring čar, ƀôn prong.

Khua dêh čar ơi Phạm Minh Chính pơtrut brơi nao mơnuih djru kơ bruă pơhlôm pơgang klin

Tui hăng anun, ƀơi anăp klin Kheng Covid 19 ăt ƀă hyu kơtang, kiăng kơtưn nao djru brơi hmao kru mơnuih ngă bruă ia jrao jing ƀing ơi ia jrao, nai ia jrao, djru pơjrao mơnuih duăm kraih ƀơi lu tơring čar hơmâo mrô mơnuih ƀă klin kơtang pơ kual dơnung. Khua dêh čar git gai:

Khua ding jum ia jrao sem lăng, ngă tui hmar hloh amăng bruă git gai pơtô hrăm, pơđĭ tui tơlơi thâo thăi pơjrao ƀing duăm kraih amăng dêh čar; lăng nao kơ tơlơi kiăng hăng anŏ dưi djru hrom amăng dêh čar, pok pơhai mơtam hơdră pơjrao pơ djop anih, djru mơnuih nao mă bruă pơ anih hơmâo klin ƀă kơtang, mơnuih duăm kraih.

Khua Jơnum min mơnuih ƀôn sang djop tơring čar, ƀôn prong git gai, ngă gêh găl hloh djop sang bruă ia jrao tơring čar ngă hrom bruă djru mơnuih yua kơ Ding jum ia jrao dêh čar pơpha bruă.

Nay Jek: Pơblang