VOV4.Jarai-Tlam lơ 5/12, Khua dêh čar ơi Phạm Minh Chính git gai jơnum mơ̆ng ataih lăng nao rai amăng tivi mơ̆ng khua mua kơnuk kơna hăng khua mua 8 boh tơring čar kual Dơnong Tong krah laih anun kual Dap Kơdư kơ bruă pơhlôm, pơgang klin, pơsir tơlơi răm ƀăm ia ling dăo ngă.

Nao jơnum ƀơi hơdôm anih ƀuh ƀô̆ mơta mơ̆ng tơring čar Thừa Thiên Huế, Quảng Nam, Quảng Ngãi, Bình Định, Phú Yên, Khánh Hoà, Gia Lai, Dak Lak hơmâo Khua jơnum min mơnuih ƀôn sang tơring čar hăng khua mua lu gơnong bruă, anom bruă tơring čar. Pơhiăp ƀơi mông jơnum, Khua dêh čar ơi Phạm Minh Chính brơi thâo, hrơi blan rơgao, tơlơi pơhing hơjan hlim ia ling dăo amăng kual ngă răm ƀăm kơtang kơ mơnuih hăng dram gơnam, hmua pơdai…ƀơi 8 boh tơring čar kual Dơnung Tong krah laih anun kual Dap Kơdư bơbeč yua kơtang.

Kơnuk kơna git gai hăng mơ-it grup khua mua nao ĕp lăng hrom hăng tơring čar pơsir bruă pơhlôm, pơgang klin laih anun rŭ glăi tơlơi răm ƀăm ia ling dăo ngă. Pơ anăp anai, Khua dêh čar git gai brơi pơsir tañ boh tơhnal ia ling dăo, boh nik ñu rơmet set ngă rogoh ayuh hyiăng anih dŏ, jak iâu ƀing tơhan plơi, tơhan ƀơi să djru duñ djah djâo, rơmô kơbao hlô mơnong djai ba dor hĭ, pruih ia jrao pơdjai kman.

8 boh tơring čar khom thâo tong ten tơlơi pơhing laih anun pơsir tañ anŏ răm ƀăm sat truh ngă, rŭ glăi bruă sĭ mơdrô laih anun pơhơđong tơlơi hơdip mơda mơnuih ƀôn sang hăng pơgang kjăp klin kheng.

Nay Jek: Pơblang