VOV4.Jarai - Ƀơi anăp tơlơi hŭi rơhyưt kơtang mơng klin covid-19 ƀơi ƀon prong Hồ Chí Minh hăng hơdôm boh tơring čar prong gah dơnung, mơguah lơ 15/7, Khua dêh čar ơi Phạm Minh Chính git gai jơnum lăng nao rai amăng tivi hăng 27 boh tơring čar kual Dơnung kơ bruă pơhlôm, pơgang klin Covid-19. Ƀơi mông jơnum, Khua dêh čar ta kiăng abih bang ƀing khua pơƀut bơkơtuai pơtŏng glăi klin Covid-19 ră anai laih anun lăi pơthâo lăng hlâo tơlơi hơmâo amăng hrơi blan pơ anăp; boh than dưi ngă, tơlơi aka ƀu dưi ngă, hơdră pơsir amăng hrơi blan rơgao laih anun yua hơget dưi hăng, yua hơget ƀu dưi ngă; črâo pơƀuh hơdôm tơlơi kiăng kơđiăng lui hăng tơlơi rơkâo đĭ, gum pơhiăp, hơdôm bruă kiăng ngă amăng hrơi blan pơ anăp, biă ñu amăng bruă git gai, pơphun bruă, ngă hrŏm kơplah wah anom bruă, tơring čar plơi pla či pơgang klin Covid-19 klă hloh, kiăo tui pran jua pơgang ba tơlơi suaih pral mơnuih ƀon sang yơh phun.

Siu H’Mai: Pơblang