VOV4.Jarai - Lơ 30/7, Khua dêh čar ta, ơi Phạm Minh Chính git gai Jơnum lăng nao rai amăng tivi Kơnuk kơna hăng hơdôm bôh tơring čar, ƀôn prong kơ tơlơi pơgang, pơgăn klin Covid-19 hăng jơlan gah pơphun, pok pơhai ngă tui hơdôm bôh yôm, bruă mă dưi hmâo Khua pơ ala mơnuih ƀôn sang dêh čar ta tal 15 pơsit amăng Tal jơnum lok sa bơdjơ̆ nao bruă pơgang, pơgăn klin Covid-19. Khua dêh čar ta, ơi Phạm Minh Chính brơi thâo, klin Covid-19 ngă tal 4 anai hmâo găn rơgao laih 100 hrơi; tơlơi klin ngă ăt dô̆ tơnap mơn, biă ñu lĕ ƀơi ƀôn prong Hồ Chí Minh, sa dua bôh tơring čar gah Dơnung dêh čar hăng kual Tŏng krah. Hơdôm hrơi rơgao, hrom hăng tơlơi git gai, črâo ba mơng Ping gah, Khua pơ ala mơnuih ƀôn sang dêh čar ta hmâo pơphun laih kơtang tit, sit nik hăng “Bruă pơgang, pơgăn klin Covid-19”. Khua dêh čar rơkâo ƀing khua pơ ala nao pơhmư̆ mông Jơnum đing nao bơkơtuai kơ tơlơi pơgang, pơgăn klin Covid-19, kiăng hluai tui anun, Kơnuk kơna amra hmâo Tơlơi pơtrun pơsit mơng Kơnuk kơna kơ bruă ngă tui hơdôm jơlan gah ječ pơgang, pơgăn klin Covid-19./.

Siu H’ Prăk: Pô pơblang