VOV4.Jarai - Lơ 19/8, Khua dêh čar ơi Phạm Minh Chính git gai Jơnum lăng nao rai amăng tivi kơ bruă dưm dăp bruă mă. Khua dêh čar kiăng khua mua Ping gah, Khua Jơnum min mơnuih ƀon sang djŏp tơring čar glăk brơi pơčlah mơnuih mơnam lĕ ăt ngă bruă klă mơn, tơring čar ƀơi thơ huăi pơčlah mơnuih mơnam lĕ brơi mơnuih mă bruă nao djru kơ hơdôm boh tơring čar kual Dơnung, biă ñu lĕ pơđĭ tui tơlơi apăn bruă djru pơjrao mơnuih ruă kơtang. Khua dêh čar jak iâu abih bang tơring čar thâo hluh thâo pap nao rai; bơni kơ hơdôm boh tơring čar hơmâo djru gơnam tam kơ hơdôm boh tơring čar, ƀon prong kual Dơnung.

Anih jơnum phun ƀơi Anom bruă Kơnuk kơna

Pơhiăp pơđut mông jơnum, Khua dêh čar ơi Phạm Minh Chính rơkâo hơdôm ding jum pơhmư̆ tơlơi pơgôp hiăp mơng tơring čar laih anun tơring čar ăt hmư̆ tui mơn tơlơi pơgôp hiăp mơng ding jum, anom bruă đah mơng gum djru nao rai bruă dưm dăp, čuk pơkra anih anom. Bruă dưm dăp, kăng kual lŏn či čuk pơkra khŏm nao hlâo, sem lăng bruă dưm dăp, kah pơpha hiưm pă, ngă rơđah brơi Tơlơi phiăn dưm dăp kah pơpha mơng Ƀirô khua pơ ala mơnuih ƀon sang dêh čar, kiăo tui tơlơi hơmâo, tơlơi dưi đĭ kyar mơng tơring čar, ding jum, anom bruă kiăng pơđĭ kyar hơđong. Dưm dăp, čuk pơkra klă kah mơng hơmâo kơčăo bruă klă, hơmâo pô tuh pơ alin klă, mă yua klă prăk pioh tuh pơ alin bruă dêh čar, pơđĭ kyar bơwih ƀong huă - mơnuih mơnam klă hloh.

Siu H’Mai: Pơblang