VOV4.Jarai-Tlam lơ 17/5, ƀơi anom bruă Kơnuk kơna, Khua dêh čar, ơi Phạm Minh Chính, git gai jơnum khua mua amăng kơnuk kơna dêh čar kơ bruă pơhlôm pơgang klin Covid 19; kiăng hơmâo tơlơi pơtrun hmao kru kơ bruă blơi pơmut, pơkra ming ia jrao vaccine pioh tlâ̆o pơgang laih anun pơpha bruă mă ngă tui.

Ră anai, tơlơi pơhing klin kheng tơnap tap biă mă, boh nik ñu anih klin hơđuh rai kơtang ƀơi tơring čar Bắc Giang hăng Bắc Ninh-anih hơmâo lu ƀut bruă tuh tia pơkra ming, lu mơnuih mă bruă ngă kông ñơn pơtum ha anih laih anun ƀă tañ.

Khua dêh čar ơi Phạm Minh Chính lăi pơtong, tơhnal pơkă ăt ngă tui dua boh tŭ yua pơgang klin rah, pơđĭ kyar bơwih ƀong huă rah, pơgang hơđong bruă ruah khua pơ ala mơnuih ƀôn sang dêh čar tal XV hăng ƀing pơ ala mơnuih ƀôn sang djop gưl rơwang bruă thun 2021-2026; pơđut hiam klă thun hrăm thun 2021; lăng kơ bruă pơgang tơlơi suaih pral mơnuih ƀôn sang yơh prong hloh, hlâo hloh.

Nay Jek: Pơblang