VOV4.Jarai - Lơ 7/9, Khua dêh čar ơi Phạm Minh Chính git gai jơnum lăng nao rai amăng tivi hăng Gơnong dlông, hơdôm ding jum anom bruă bơdjơ̆ nao hơdôm boh tơring čar, ƀon prong hơmâo ia rơsĭ kơ bruă pơgăn hyu mă akan hơdang soh tơlơi phiăn, ƀu lăi pơhmư̆ hăng ƀu ngă tui tơlơi pơkôl pơkă. Ƀơi mông jơnum, hơdôm boh tơring čar ter hang ia rơsĭ hơmâo lăi pơthâo glăi laih hăng Khua dêh čar kơ bruă ngă tui tơlơi git gai, laih dong ba pơƀuh kơ kơnuk kơna, Khua dêh čar hơdôm tơlơi rơkâo đĭ, laih anun ăt ƀuăn hăng Khua dêh čar khut khăt ƀu pioh hơmâo tơlơi soh glăi anai ôh. Klah čun glăi mông jơnum, Khua dêh čar lăi rơđah tui hơdră pơđĭ kyar akan hơdang Việt Nam, truh thun 2030, gơnam mơng akan hơdang hơmâo 10 klăk tơn hăng mrô prăk pơhrui glăi hơmâo năng ai mơng 14 truh 16 klai đolar Mi. Bruă mă mơng mơnuih hyu mă akan hơdang ƀơi ia rơsĭ jing djru 1 klăk čô mơnuih hăng 4 klăk čô mơnuih bơdjơ̆ nao hơmâo bruă mă, hơmâo tơlơi bơwih ƀong; djru pơđĭ kyar bruă bơwih ƀong mơng akan hơdang, pơđĭ tui tơlơi hơdip mơng mơnuih ƀon sang, pơđĭ kyar tơlơi bơwih ƀong huă mơng lŏn ia, djru pơgang ba tơlơi rơnuk rơnua, hơđong kơjăp kual ia rơsĭ dêh čar ta.

Siu H’Mai: Pơblang