VOV4.Jarai-Tom brơi, lơ 28/9, pơhiăp bơkơtuai nao rai lăng amăng tivi hăng lu anih amăng dêh čar kơ bruă čan prăk tuh pơ alin bruă čar, Khua dêh čar ơi Phạm Minh Chính lăi pơtong, kơnuk kơna, khua dêh čar hơmâo lu tơlơi pơblih phrâo, khut khăt amăng bruă git gai akŏ bruă tuh pơ alin thun 2021. Kơnuk kơna, khua dêh čar pơtong rơđah, anăp ngă bruă, tơhnal pơtrun, git gai “kiăng rơnoh brơi čan thun 2021 truh 95% akŏ bruă, djru hrom yôm biă mă amăng bruă rŭ glăi hăng pơđĭ kyar bơwih ƀong huă lơ̆m hrơi blan hơmâo klin Covid 19".

Bruă mă pơsir prăk čan pioh tuh pơ alin kơ bruă čar pok pơhai sa amăng plĕ laih anun hơmâo anŏ tŭ yua klă. Khua dêh čar lăi, tuh pơ alin kơ bruă čar jing boh yôm phun, pioh ngă giong tơhnal pơtrun pơđĭ kyar bơwih ƀong huă mơnuih mơnam thun 2021, amăng hơdôm blan dŏ glăi thun 2021, khua dêh čar rơkâo, djop ding jum, anom bruă ngă tui khut khăt, sa hơdră, pơsir hmao kru anŏ dŏ gun, tơnap tap, kiăng pơhluh hĭ anih kơđông pơtrut ngă tui brơi čan prăk mă yua tuh pơ alin.

Nay Jek: Pơblang