VOV4.Jarai - Lơ 18/5, Khua dêh čar ta ơi Phạm Minh Chính mă bruă hăng Ding jum man pơdong kơ bruă ngă tui bruă jao mơng gơnong bruă anai, hơdôm bruă dŏ aka ƀu klă, kiăng ječ ameč pơsir hĭ, hơdôm bruă yôm phun, sui thun, hơdôm tơlơi rơkâo mơng gơnong bruă anai. Mă bruă hăng Ding jum man pơdong, Khua dêh čar ta ơi Phạm Minh Chính hơmâo lăi nao hơdôm hơdră bruă pơplih phrâo kiăng pơđĭ kyar amăng gơnong bruă pơ anăp anai, anun lĕ pơđĭ kyar amăng bruă lŏn mơnai pơlir hăng ngă bơkơnar hăng hiam klă amăng mơnuih mơnam; ba bruă pơđĭ kyar plơi prong jing sa bruă bơwih ƀong yôm phun; lăng yôm hăng tuh pơ alin lăp djơ̆ amăng bruă man pơdong anih anom; pơjing hơdră bruă kiăng pơhưč tuh pơ alin, Khua dêh čar ta lăi pơtong, “bruă pơhưč rơnoh prăk tuh pơ alin lĕ yôm phăn biă mă”.

Lăi pơthâo kơ Khua dêh čar, Khua ding jum man pơdong Nguyễn Thanh Nghị lăi rơđah hơdôm boh than dưi ngă amăng bruă wai lăng. Amăng rơwang thun 2016-2020, Ding jum hơmâo gơgrong pel ĕp, lui hĭ hơdôm tơlơi pơkă ƀu gal kơplah wah hơdôm hră čih pơkra tơlơi phiăn, kơtưn klă amăng bruă ngă hră pơ-ar. Ding jum đing nao pơđĭ kyar man pơdong sang, truh thun 2020, đơ đam dêh čar glăk pok pơhai ngă giăm 5.000 akŏ bruă man pơdong sang dŏ, plơi prong phrâo (đĭ giăm 3 wŏt pơhmu hăng thun 2010). Sĭ mơdrô lŏn mơnai aka ƀu hơmâo anŏ pơplih ngă sat ôh.

Siu Đoan: Pơblang