VOV4.Jarai - Amăng rơwang hrơi tơjuh rơgao, Khua dêh čar git gai mông ngă bruă kơplah Khua mua apăn bruă Kơnuk kơna hăng khua mua Anom bruă pơtô mơnuih ƀon sang mơng Ping gah, Jơnum min djŏp djuai ania mơnuih mơnam Việt Nam hăng hơdôm anom bruă kơ bruă pơhlôm pơgang klin Covid-19, lăng ba tơlơi hơdip mơnuih ƀon sang. khua dêh čar ơi Phạm Minh Chính pơsit, Kơnuk kơna amra ngă hrŏm klă hăng Anom bruă pơtô ba mơnuih ƀon sang mơng Ping gah dêh čar, Jơnum min djŏp djuai ania mơnuih mơnam djŏp gưl, khul grup amăng bruă pơhlôm, pơgang klin covid-19; laih dong pơsit tơlơi gơgrong bruă prong mơng bruă pơtô pơblang mơnuih ƀon sang, hyu pôr pơthâo, iâu pơthưr mơnuih ƀon sang thâo hluh thâo pơmin yua tơlơi suaih pral sit pô ta, yua kơ mơnuih mơnam hăng yua tơlơi đĭ kyar mơng lŏn ia.

Ƀơi mông ngă bruă, Khua mua pơtô ba mơnuih ƀon sang dêh čar ta kiăng Jơnum min djŏp djuai ania mơnuih mơnam, djŏp khul grup iâu pơthưr dong kơ mơnuih ƀon sang kiăng ngă klă bruă pơčlah mơnuih mơnam tui tơlơi pơčrâo trun mrô 16 ƀơi hơdôm plơi pla; lăi pơthâo kiăng Kơnuk kơna ngă klă hloh dong bruă djru kơ mơnuih mơnam, djru ba ƀing glăk tơnap tap yua dŏ pơčlah mơnuih mơnam, biă ñu mơnuih rơngiă bruă mă; Kơnuk kơna git gai kơ Ding jum Mơnuih mă bruă - Tơhan rơka hăng Mơnuih mơnam sem lăng, pơhrua tui mơnuih dưi ƀong prăk djru mơng Kơnuk kơna; Kơnuk kơna kiăng lăng ba hloh dong kơ ƀing ơi ia jrao glăk dŏ pơjrao, wai lăng mơnuih ƀă klin; ječ ameč tlâ̆o brơi ƀing hơmâo anăn kiăng tlâ̆o hlâo...

Pơhiăp ƀơi mông ngă bruă, Khua dêh čar ơi Phạm Minh Chính lăi rơđah, amăng hrơi blan klin kơtang tui anai yua hơmâo djuai kman phrâo, ƀing ta khŏm hơmâo hơdră ngă bruă phrâo, ngă klă hloh dong, bơwih brơi kơ mơnuih ƀon sang. Kơnuk kơna khŏm akŏ pơdong sa Kơnuk kơna pơplih klă hloh, ngă bruă tơpă sit, tŭ yua, bơwih brơi mơnuih ƀon sang. Pơtrut tui tơlơi hơmâo ngă, pơđĭ tui tơlơi rô nao rai Ping gah git gai, Kơnuk kơna wai lăng, mơnuih ƀon sang ngă pô hluai tui Jơnum min wai lăng djŏp djuai ania mơnuih mơnam, khul grup, gum pơgôp tơlơi pơhiăp, lăi glăi tơlơi aka ƀu djơ̆. Khua dêh čar ta pơsit, mơnuih ƀon sang yơh pô tong krah, ngă phun akha amăng bruă pơgang klin.

Khua dêh čar ta lăi rơđah, bruă pơtô mơnuih ƀon sang amăng anom bruă kơnuk kơna kiăng ngă kiăo tui tơlơi git gai mơng Ping gah, Kơnuk kơna, djru pơplih phrâo kơjăp kơtang kơ bruă pơtô ba mơnuih ƀon sang. Jơnum min wai lăng djŏp djuai ania mơnuih mơnam Việt Nam mơng gơnong dlông truh pơ plơi pla hơmâo tơlơi gum pơgôp, ngă bơrơnôm nao rai mơng mơnuih amăng khul, djru ba mơnuih tơnap tap. Khua dêh čar lăi rơđah, tơlơi rơgơi mơng rơnuk blah wang đưm hlâo brơi ƀuh, bruă iâu pơthưr mơnuih ƀon sang pơgôp pran jua kơtang, tơlơi gum pơgôp, hơdip rơnôm mơng djuai ania ta jing tơlơi yôm biă mă. Khŏm jak iâu mơnuih ƀon sang gum ngă đah mơng djru pơgang ba drơi gơñu mơn. Khua dêh čar ta lăi:

“Wa Hồ hơmâo lăi laih “pơtô mơnuih ƀon sang rơgơi lĕ bruă hơget lêng dưi ngă soh” Wa ăt pơtă mơn “tơhan mơnuih ƀon sang prong biă, bruă iâu pơthưr pơtô ba mơnuih ƀon sang jing bruă yôm ƀôm, ƀu dưi kơnong mă yua hră pơ-ar, jơnum, hyu jak iâu, hyu plĕ hră, pơtrun hră đôč ôh” blung hlâo lĕ khŏm ĕp hơdră pơblang rơđah brơi kơ mơnuih ƀon sang thâo hluh anun lĕ tơlơi klă hiam kơ ƀing gơñu, gơñu khŏm gir kơtir ngă bruă khŏm dưi”, ƀing ta ƀu dưi kơnong hyu pôr tơlơi čih amăng hră đôč ôh, ƀing ta khŏm hyu jak iâu, hyu pơtô, ƀing ta iâu pơthưr kiăng ană plơi thâo hluh, yua tơlơi suaih pral kơ ƀing gơñu mơn, yua tơlơi suaih pral kơ abih bang mơnuih, yua tơlơi đĭ kyar mơng lŏn ia ta mơn”.

Him lăng klin kheng amăng hrơi blan pơ anăp ăt dŏ kơtang đôč, biă ñu ƀơi ƀon prong Hồ Chí Minh hăng hơdôm boh tơring čar, ƀon prong kual Dơnung. Yua hnun kiăng ngă tui klă tơlơi pơkă mơng Ping gah, Kơnuk kơna kơ bruă pơhlôm, pơgang klin. Jơnum min djŏp djuai ania mơnuih mơnam hăng hơdôm khul grup kiăng pơtrut pran jua, wai lăng; djru ba. Khŏm pơhlôm rơnuk rơnua, hơđong mơnuih mơnam, plơi pla, ngă tui klă djŏp tơlơi pơkă pơgang klin. Khua dêh čar lăi nao lu kơ bruă pơtrut tui tơlơi gơgrong bruă mơng Anom bruă pơtô mơnuih ƀon sang amăng tơlơi truh sat, biă ñu amăng mông hơmâo klin Covid-19 anai.

“Kâo kiăng ƀing khua pơtô mơnuih ƀon sang dêh čar pơtrut tui tơlơi apăn bruă lơ̆m hơmâo tơlơi truh sat. Anom pơtô ba mơnuih ƀon sang git gai, ngă hrŏm hăng Jơnum min wai lăng djŏp djuai ania mơnuih mơnam Việt Nam, hơdôm khul grup wai lăng mơnuih mơnam, anom bruă bơdjơ̆ nao jak iâu ƀing hlăk ai, ding kơna amăng khul, mơnuih ƀon sang ngă tui tơlơi git gai mơng ping gah, gong gai plơi pla, pơtrut tui tơlơi gơgrong bruă kơđi čar, djru ba tơhan nao hlâo ngă bruă. Lăi pơthâo klă djŏp tơlơi pơtrun, hyu pơtô pơblang, iâu pơthưr ƀing khua, mơnuih ping gah, mơnuih ƀon sang ngă tui tơlơi pơtrun mơng Ping gah, tơlơi phiăn mơng Kơnuk kơna hăng bruă ngă sit nik, pơtrut tui tơlơi ngă pô mơng mơnuih ƀon sang, pơđĭ tui tơlơi pơmin pran jua kơtang mơng djuai ania, abih bang mơnuih hơdip ha pran, hơkrŭ tui tơlơi đăo gơnang hăng Ping gah, Kơnuk kơna”.

Hăng khul tơhan hơđăp, pran jua gơñu ăt jing tơhan blah ngă mơn, mă bruă hăng pơkra gơnam. Hlăk ai mut phung Hồ Chí Minh pơtrut tui hơdôm bruă kiăng nao hlâo, kiăng pơplih ming kơjăp hloh, ngă bruă kiăo tui plơi pla, thâo rơđah mơnuih ƀon sang hơdip hiư̆m pă. Khul đah kơmơi Việt Nam, Khul Mơnuih ngă hmua Việt Nam...kiăng “pơphun glăi” abih bang ding kơna gum djru pơgang klin. Khul mut phung mơnuih mă bruă ăt kiăng jak iâu abih bang mơnuih mă bruă gum djru bruă pơgang klin. Jơnum min wai lăng djŏp djuai ania mơnuih mơnam Việt Nam hăng hơdôm khul grup ăt kiăng krăp lăng tơlơi hơmâo ƀơi plơi pla mơn.

Khua dêh čar ăt pơtă mơn, amăng bruă čơkă mơnuih duam ruă lĕ kiăng “brơi mut pơjrao hlâo, ngă hră pơ-ar tơdơi”. Rơngiao kơ pơjrao brơi ƀing F0 ƀơi sang ia jrao hăng brơi pơčlah ƀing F0 pơ sang lĕ Ding jum ia jrao kiăng sem lăng pơjrao brơi ƀing ƀă kman mơ̆ ƀu djơ̆ pơ sang ia jrao, ƀu djơ̆ ƀing dŏ pơ sang ôh mơ̆ pơjrao brơi mơnuih ruă dŏ pơ anih pơpă tŭ mơn, tŭ kơ anih anun rơhuaih, brơi mơnuih mơnam dŏ pơataih nao rai. Pơjrao hăng ia jrao rơnuk phrâo wơ̆t hăng ia jrao akha mơtăm yơh. Ding jum Mơnuih mă bruă - Tơhan rơka hăng Mơnuih mơnam sem lăng, ngă tui tơlơi pơtô ba mơng Ping gah, tơlơi phiăn mơng Kơnuk kơna kơ ƀing glăk dŏ pơgang klin, biă ñu lĕ apah bơni juh alum pran jua hăng brơi prăk kăk či pơpŭ anăn./.

VOV1: Čih - Siu H’Mai: Pơblang