VOV4.Jarai - Mơguah tom brơi lơ 26/5, Khua dêh čar ta ơi Phạm Minh Chính mă bruă lăng nao rai amăng tivi hăng tơring čar Bắc Ninh hăng Bắc Giang kiăng kơ ba tơbiă hơdôm hơdră ječ amăng hrơi blan klin Covid-19 glăk lar hyu kơtang hăng hơmâo lu mơnuih ƀă klin. Amăng mông jơnum, Khua dêh čar ta ơi Phạm Minh Chính rơkâo khua git gai tơring čar Bắc Giang, Bắc Ninh hăng djop ding jum, gơnong bruă bơdjơ̆ nao, lăi pơthâo, sem lăng tong ten klin kman kah hăng ba tơbiă hơdôm hơdră pơgang tŏ tui pơ anăp dong kiăng kơ tañ pơgăn hĭ klin ƀơi dua boh tơring čar anai. Tui hăng djop ding jum, gơnong bruă, gong gai, hơdră bruă akŏ phun ră anai lĕ pruih ia jrao pơdjai ƀơi hơdôm sang măi, pơčrang lăng abih công nhơn tui hơdră pơčrang lăng klin tañ hloh, giăm 3 hrơi amra pơphun ha wŏt ƀơi hơdôm sang măi, tañ ĕp ƀuh ƀing F0 ba đuăi mơng anih dŏ hơdip tañ hloh, pơdơi hĭ bruă pơplih nao rai mơnuih mă bruă kơplah wah hơdôm sang măi. Pơčlah mơnuih amăng đơ đam tơring čar, wai lăng kjăp hơdôm anih pơčlah, ƀu brơi klin lar hyu mơng pô anai nao pô adih.

Siu Đoan: Pơblang