VOV4.Jarai-Mơguah lơ 8/7, ƀơi anăp kơ klin ƀă hmar, tơnap tap Covid 19 ngă ƀơi ƀôn prong Hồ Chí Minh, tơdơi kơ tŭ ư tơlơi rơkâo mơ̆ng ƀôn prong Hồ Chí Minh ngă tui tơlơi pơčrâo trun mrô 16, Khua dêh čar ơi Phạm Minh Chính hơmâo git gai kơnuk kơna jơnum mơ̆ng ataih, lăng nao rai amăng tivi hăng khua mua ƀôn prong Hồ Chí Minh, pioh pơčrông sai, tŭ ư sa hnong tơlơi thâo hluh, bruă ngă, hơdră pơsir laih anun iâu pơthưr mơnuih ƀôn sang ƀôn prong djru hrom amăng bruă kơđi čar pơhlôm, pơgang klin Covid 19 tŭ yua.

Khua dêh čar lăng yôm tơlơi gir run mơ̆ng ƀôn prong Hồ Chí Minh, tơlơi git gai, tơlơi ngă hrom djop sang bruă ping gah, gong gai kơnuk kơna djơp gưl. Samơ̆ truh ră anai klin Covid 19 ƀơi ƀôn prong Hồ Chí Minh ăt tơnap tap hŭi rơhyưt biă mă. Tui hăng tơlơi rơkâo mơ̆ng khua mua ƀôn prong, khua mua amăng kơnuk kơna dêh čar, Khua dêh čar tŭ ư brơi ngă hơdră kơtang hloh, ngă tui tơlơi pơčrâo trun mrô 16, pơgăn bruă đuăi hyu amăng ƀôn prong Hồ Chí Minh amăng 15 hrơi, kiăng pơgăn hĭ klin duăm ruă ƀơi ƀôn prong HCM.

Khua dêh čar lăi, ngă tui hơdră pơgăn mơnuih mơnam tơbiă hyu samơ̆ tơlơi hơdip mơnuih ƀôn sang ăt huăi blư̆ blang lơi, pơgang hơđong tơlơi rơnuk rơnua, lăng tơlơi suaih pral kơ mơnuih ƀôn sang yơh yôm hloh. Pơđing nao hlâo kơ bruă pơhlôm, pơgang Covid 19, pơpha ia jrao vaccine hlâo kơ ƀôn prong Hồ Chí Minh tlâ̆o pơgang.

Nay Jek: Pơblang