VOV4.Jarai - Tlam lơ 28/6, ƀơi Ƀirô mă bruă, Khua pơ ala mơnuih ƀon sang dêh čar ta ơi Vương Đình Huệ hơmâo mông bưp Khua git gai Ping gah, Khua mir sir Lao ơi Thongloun Sisoulith. Khua git gai Ping gah, Khua mir sir Lao ơi Thongloun Sisoulith hăng Khua pơ ala mơnuih ƀon sang dêh čar ta ơi Vương Đình Huệ lêng kơ brơi thâo, tal rai čuă mơng Khua git gai Ping gah, Khua mir sir Lao lĕ pơdah rơđah tơlơi rô nao rai giang mah yôm phăn, mut hrŏm hăng ngă hrŏm djop mơta bruă kơplah wah Việt Nam - Lao. Ƀơi anăp kơ klin Covid-19 glăk ngă tơnap tap amăng kual, Việt Nam lăng yôm hơdôm hơdră pơgang klin mơ̆ dêh čar Lao glăk pơphun ngă tui; lăi pơtong, dêh čar Lao amra tañ pơgang kjăp klin, tŏ ngă truh kih hơdôm tơlơi pơsit mơng jơnum Ping gah mơnuih ƀon sang Lao tal 11. Khua git gai Ping gah, Khua mir sir dêh čar Lao ơi Thongluon Sisilith lăi pơtong, pơ anăp anai, Khua pơ ala mơnuih ƀon sang dêh čar dua bơnah kiăng tŏ tui bưp nao rai, kơtưn ngă hrŏm, pơlăi nao rai tơlơi găn rơgao, biă mă ñu lĕ amăng pơjing hơdră bruă, tơlơi phiăn hăng krăo lăng kjăp hơdôm bruă mơng Kơnuk kơna; gum hrŏm lu dong kơplah wah Jơnum min amăng Ƀirô Khua pơ ala mơnuih ƀon sang dêh čar dua boh dêh čar lơ̆m ngă tui hơdôm tơlơi pơkôl ngă hrŏm dua bơnah.

Tlam lơ 28/6, ƀơi sang bruă Kơnuk kơna, Khua dêh čar ơi Phạm Minh Chính hơmâo jơnum hăng Khua git gai Ping gah Khua mir sir dêh čar lao Thoong-lun Xi-xu-lit glăk rai čuă dêh čar Việt Nam. Khua git gai Ping gah, Khua mir sir dêh čar Lao ơi Thoong-lun Xi-xu-lit hok mơak lơ̆m pot glăi čuă Việt Nam lơ̆m ñu gơgrong bruă phrâo, hơ-ơč hmưi hơdôm tơlơi dưi ngă prong, abih bang mơng Việt Nam amăng bruă pơđĭ kyar bơwih ƀong huă - mơnuih mơnam hăng mut hrŏm jar kmar amăng hơdôm thun rơgao. Dua čô khua bơlăi nao rai tơlơi hơmâo amăng dêh čar hăng bơni biă hơdră pơgang klin Covid-19 ƀơi rim boh dêh čar. Mah bơbeč yua klin Covid-19, dua bơnah ăt djă pioh mơn tơlơi pơtom hiăp, pơbưp nao rai khua mua pơprong, pơtrut đĭ tŭ yua tơlơi kĭ pơkôl ngă hrŏm dua bơnah ƀơi djŏp gưl; ngă hrŏm amăng bruă rơnuk rơnua, ling tơhan, bơwih ƀong huă, jơlan nao rai, pơtô hrăm, ngă hrŏm kơplah wah hơdôm kual plơi pla hơmâo đĭ kyar na nao; prăk pơhrui mơng bruă sĭ mơdrô dua bơnah 5 blan akŏ thun 2021 hơmâo 570 klăk 700 rơbâo dolar Mi, đĭ giăm 40% pơhmu hăng thun 2020; ră anai Việt Nam hơmâo 208 kơčăo bruă tuh pơ alin pơ Lao hăng mrô prăk 5,16 klai dolar Mi.

Siu H'Mai - Siu Đoan: Pơblang