VOV4.Jarai - Anom bruă Kơnuk kơna phrâo ngă hră lăi glăi tơlơi git gai mơng Khua dêh čar ơi Phạm Minh Chính kơ bruă apah bơni, juh alum hơdôm grup, mơnuih mơnam gum djru prong amăng bruă pơgang klin Covid-19. Tui anun, amăng hrơi blan rơgao, lu tơring čar hơmâo ngă bruă klă, khut khăt, pơčeh phrâo, tŭ yua hơdră pơgang klin Covid-19. Kiăng pơdah pran jua thâo pơpŭ kơ ƀing khul grup, mơnuih glăk nao hlâo pơgang klin, Khua dêh čar ta ơi Phạm Minh Chính kiăng ding jum, anom bruă prong kar hăng ding jum, Jơnum min mơnuih ƀon sang djŏp tơring čar, ƀon prong juh alum, apah bơni tañ kơ hơdôm khul grup, mơnuih hơmâo hơdră pơgang klin tŭ yua. Laih dong, hơmâo hơdră djru lăng ba tơlơi hơdip kơ ƀing glăk dŏ pơ anih pơgang klin phun hăng ƀing amĭ ama, ană bă mơng ƀing glăk djru pơgang klin.

Siu H’Mai: Pơblang