VOV4.Jarai - Tơdơi kơ tal nao čuă hăng ngă bruă bưp ƀơi anăp phrâo anai ƀơi sa, dua anom bruă pơkra vaccine, ia jrao pioh pơgang klin Covid-19, Khua dêh čar ơi Phạm Minh Chính git gai, kiăng pơƀut črâo bruă, ngă amuñ brơi, dưm dăp mơnuih mă bruă kiăng dưi kơsem min, jao boh thâo ia rơgơi đah mơng tañ mă yua vaccine pơkra amăng dêh čar ta, hmao djru brơi bruă pơhlôm pơgang klin Covid-19. Gir kaih hloh lĕ blan 6 thun 2022 dưi pơkra rai vaccine. Hăng pran jua kơsem min klă, tong ten, hơdôm Ding jum, anom bruă, tơring čar bơdjơ̆ nao khŏm gơgrong bruă, ngă amuñ brơi, pơsir brơi tơlơi tơnap, tơlơi ngă gun kơ bruă jao glăi boh thâo, măi mok, kơsem min pơkra vaccine. Khua dêh čar jao kơ Ding jum ia jrao git gai, ngă hrŏm hăng hơdôm Ding jum, anom bruă bơdjơ̆ nao čih pơkra akŏ bruă jao măi mok, kơsem min, pơkra vaccine, amăng anun hơmâo vaccine pơgang klin Covid-19 tui tơlơi pơkôl, pơkă, pơhlôm djơ̆ hrơi kiăng, rơnuk rơnua hăng kơsem min tui tơlơi rơkâo ngă hră pơ-ar amuñ, tañ, lăi pơthâo kơ djŏp gưl gơgrong bruă anai sem lăng, pơsit brơi.

Siu H’Mai: Pơblang