VOV4.Jarai -  Čơtlăm lơ 31/10, ƀơi dêh čar Anglê, Khua dêh čar ta ơi Phạm Minh Chính nao pơhmư̆, lăng tơlơi ngă lơphet kĭ pơkôl, jao 26 tơlơi pơkôl gum hrom amăng hơdôm mơta bruă kơplah wah Việt Nam hăng hơdôm bơnah gah Anglê.

Amăng mrô 25 mơta tơlơi pơkôl dưi kĭ, ƀơk brơi, hmâo lu tơlơi pơkôl, gum hrom hmâo tơlơi gum pơhiăp yôm phăn dưi hmâo hơdôm ding jum, gơnong bruă kĭ pơkôl, tŭ mă kah hăng: Tơlơi pơmin gum hrom pơčeh phrâo Khul pơlir hơbit hrŏ trun djah tuh hluai tui kơtưn prăk wai lăng dlai kyâu; Tơlơi pơkôl gum hrom pơdŏng Kơčăo bruă ngă kiăng kơtư̆n pơlir nao rai hăng anom bruă pơtô gưl dlông kơplah wah dua bôh dêh čar; Hră čih djă pioh kơ Kơtưn gum hrom amăng pơtô pơhrăm hluai tui lăi pơthâo nao rai tơlơi găn rơgao hăng hơdôm bruă mă tañ; Tơlơi pơkôl Gum hrom pơdŏng hơdôm jơlan hơdră pơtô juăt kơ mơnuih mă bruă gah Ding jum kơčăo bruă hăng tuh pơplai hăng djru hơdôm bôh Anom bơwih ƀong pơphun bruă mă kơ Việt Nam; Tơlơi pơkôl Gum hrom pơtô glăi hơdră mă yua măi mok wai lăng lŏn drŏn hăng pơtô juăt mơnuih mă bruă hmâo bơdjơ̆ nao. Tal anai Anom wai lăng rơdêh por Vietjet (Việt Nam) hăng Grŭp Rolls-Royce (Anglê) hmâo kĭ pơkôl sĭ akô̆ măi hăng bơwih brơi kơ măi mă yua kơ grŭp rơdêh por păng prong hăng abih bang nua ñu 400 klăk dolar Mi./.

Siu H’ Prăk: Pô pơblang