VOV4.Jarai - Ƀơi Hà Nội, Ping gah Khul ling tơhan, Ding jum ling tơhan hơmâo pơhun Jơnum bruă tơhan hăng kơđi čar abih bang khul tơhan 6 blan akŏ thun 2021. Ding kơna Ding jum kơđi čar, Khua dêh čar ơi Phạm Minh Chính nao pơhmư̆ hăng git gai mông jơnum; Thượng tướng Phan Văn Giang - Ding kơna Ding jum kơđi čar, Kơ-iăng khua Ping gah khul ling tơhan, Khua ding jum Ling tơhan git gai mông jơnum anai. Pơhiăp ƀơi mông jơnum, Khua dêh čar ơi Phạm Minh Chính bơni kơ ƀing khua nao jơnum hơmâo bơkơtuai tơpă, hơmâo lu tơlơi pơgôp hiăp yôm, pơhrua tui, ngă klă hloh tơlơi pơsit kơ hơdră ngă bruă. Mông jơnum hơmâo ba tơbiă 6 mơta tơlơi kiăng ngă amăng 6 blan rơnuč thun 2021. Tui anun, abih bang tơhan kiăng ngă tui dlăm hloh Tơlơi pơtrun Jơnum ping gah dêh čar tal 13, Tơlơi pơtrun Jơnum ping gah khul ling tơhan tal 11 hăng hơdôm bruă yôm phun amăng rơwang thun 2021-2026. Ping gah khul ling tơhan, Ding jum ling tơhan hơmâo pơsit sa, dua hơdră bruă yôm phun amăng hrơi blan pơ anăp, amăng anun hơmâo bruă kiăng nao hlâo, hơdeč hmar amăng bruă mă, lăi pơthâo tañ, pơsit djơ̆ tơlơi hơmâo, tañ lăi pơhmư̆ kơ Ping gah, Kơnuk kơna dưi pơsir djŏp tơlơi truh; pok pơhai dlăm tui hơdôm tơlơi pơtrun, kơčăo bruă, tơlơi phiăn pioh kơ ling tơhan.

Siu H’Mai: Pơblang