VOV4.Jarai - Khua dêh čar ơi Phạm Minh Chính ba jơlan hlâo khua mua dêh čar Việt Nam nao jơnum lăng nao rai mơng ataih Khua mua kual ASEAN - Australia tal blung a. Khua mua hơdôm dêh čar kual ASEAN, hơmâo Khua dêh čar Australia hăng Khua čih pioh kual ASEAN nao jơnum hrŏm. Đĭ pơhiăp amăng mông jơnum, Khua dêh čar ơi Phạm Minh Chính lăi pơtong dua bơnah kiăng gir djru nao rai amăng bruă sĭ mơdrô-tuh pơ alin yua bơbeč mơng klin Covid-19, pơsur hăng ngă gêh gal brơi hơdôm anom bơwih ƀong sĭ mơdrô amuñ amăng bơwih ƀong huă, mut hrŏm dơlăm dong amăng bruă sĭ mơdrô amăng kual, pơtrut ngă hrŏm amăng mă yua boh thâo phrâo, pơtô hrăm mơnuih mă bruă thâo rơgơi brơi hơdôm dêh čar kual ASEAN hăng pơbưp nao rai mơnuih ƀon sang dua bơnah. Khua dêh čar ta čang rơmang Australia amra tŏ tui dong yua kual ASEAN kiăng kơ ngă giăm ƀiă amăng bruă pơđĭ kyar, kơtưn pơlir hơdôm kual amăng ASEAN, amăng anun hơmâo kual Mê Kông hluai tui hơdôm hơdră ngă hrŏm Mê Kông -Australia, mut hrŏm amăng bruă pơjing kual ASEAN hiam klă.

Siu Đoan: Pơblang