VOV4.Jarai-Ƀrô djơ̆ tal nao čuă hăng mă bruă pơ tơring čar Cao Bằng, jơnum Hrơi Gum pơgôp djuai ania, Khua dêh čar, ơi Phạm Minh Chính nao čuă hăng pơhiăp hrom khua mua, ling tơhan, mơnuih ƀôn sang tơring glông Trùng Khánh, Cao Bằng. Khua dêh čar lăi pơtong: mah Trùng Khánh lĕ tơring glông čư̆ siăng, giăm guai dêh čar ataih mơ̆ng anom phun tơring čar, tơlơi gêh găl bơwih ƀong huă dŏ kơƀah, samơ̆ hơmâo tơlơi git gai mơ̆ng Ping gah, gong gai kơnuk kơna tơring čar, plơi pla, tơlơi gir run hrom mơ̆ng mơnuih ƀôn sang djop djuai ania adơi ayong, tơlơi pơhing bơwih ƀong huă mơnuih mơnam dưi tŭ mă lu boh tơhnal lăp bơni biă mă.

Khua dêh čar nao čuă hăng mă bruă pơ tơring glông

Trùng Khánh, Cao Bằng

Khua dêh čar rơkâo tơring glông Trùng Khánh ăt pơtrut ngă tui djơ̆ Hră pơtrun jơnum ping gah dêh čar ta tal XIII, Hră pơtrun jơnum ping gah tơring čar tal XIX, Hră pơtrun jơnum ping gah tơring glông tal XX kơ pơđĭ kyar bơwih ƀong huă mơnuih mơnam, pơgang rơnuk rơnua dêh čar, hơđong kơ mơnuih ƀôn sang, bruă pơtom hiăp laih anun akŏ pơdong kơđi čar.

Nay Jek: Pơblang