VOV4.Jarai - Mơguah lơ 15/11, Khua dêh čar ta ơi Phạm Minh Chính nao pơhmư̆ Hrơi jơnum gum hrom hơbit abih bang djuai ania ƀơi să Trường Hà, tơring glông Hà Quảng, tơring čar Cao Bằng. Pơhiăp amăng hrơi jơnum, Khua dêh čar ta lăi rơđah, amăng 19 thun rơgao, bruă pơphun Hrơi jơnum gum hrom hơbit abih bang djuai ania jing laih gru klă hiam tui phiăn juăt ƀơi abih bang hơdôm kual mơnuih ƀôn sang dô̆, amăng anun hmâo ƀut Pác Bó, Nặm Lìn hăng Nà Lẹng, să Trường Hà.

Khua dêh čar Phạm Minh Chính nao pơhmư̆ Hrơi jơnum gum hrom hơbit djop djuai ania ƀơi Cao Bằng

Pơ ala kơ khua git gai Ping gah, Kơnuk kơna, Khua dêh čar ta bơni hơdôm bôh than dưi ngă, hơdôm bôh than mơ̆ tơring glông, să, kual mơnuih ƀôn sang dô̆ mơng 3 ƀut dưi ngă amăng hơdôm hrơi rơgao hăng čang rơmang tơring čar hơkrŭ dong bruă akă dưi ngă, hrom hăng anun ngă tui pran jua gum hrom hơbit djuai ania kiăng yak rơgao tơlơi tơnap, hrưn đĭ mơng pran jua bôh akô̆ pô, mơng lŏn drŏn rơhuông adai mơng pô, dưi tŭ mă yua kơ gru grua phiăn juăt đưm hmâo mut laih amăng djuai ania kiăng hrưn đĭ, khom pơdŏng plơi pla lŏn ia jai hrơi jai pơdrong asah klă hiam, mơnuih ƀôn sang jai hrơi jai yâu mơ-ak trơi pơđao./.

Siu H’ Prăk: Pô pơblang