VOV4.Jarai - Tlam lơ 30/9, Khua dêh čar ơi Phạm Minh Chính jơnum lăng amăng tivi hăng Khul khua gum bruă Ping gah tơring čar Thừa Thiên Huế kơ tơlơi pơđĭ kyar bơwih ƀong huă - mơnuih mơnam amăng 9 blan thun 2021 hăng bruă pok pơhai ngă tui Tơlơi pơtrun jơnum mơng Ding jum kơđi čar kơ bruă akŏ pơjing hăng pơđĭ kyar tơring čar Thừa Thiên Huế truh thun 2030, anăp nao truh thun 2045. Pơđut mông jơnum, Khua dêh čar ơi Phạm Minh Chính pơsit tơring čar Thừa Thiên Huế hơmâo lu tơlơi gum pơgôp, ngă bruă tŭ yua amăng bruă pơgang klin Covid-19 hăng pơđĭ kyar tơlơi bơwih ƀong amăng hrơi blan rơgao. Sem lăng klă hloh, ngă pơgiong djŏp mơta tơlơi phiăn, hơdră ngă bruă, pơsir brơi tơlơi tơnap tap, tơlơi ngă gun kơ bruă pơkra gơnam, sĭ mơdrô; pơjing glăi bruă bơwih ƀong, pơplih phrâo hơbô̆ bruă hăng pơđĭ tui mrô gơnam pơkra rai, gơñăm nao tơlơi phun ñu lĕ pơplih phrâo bruă pơkra gơnam, bơwih brơi mơnuih blơi yua gơnam đah mơng pơđĭ nua gơnam amăng dêh čar, anŏ kơtang dưi pơhno hăng ƀing gŏp pơlir hăng ngă dưm kơnar, tŭ yua djŏp jơlan hơdră bơwih ƀong phrâo.

Siu H’Mai: Pơblang