VOV4.Jarai - Khua dêh čar ơi Phạm Minh Chính, Khua Anom bruă git gai pơgang klin Covid-19 dêh čar ta hơmâo ngă bruămơng ataih lăng nao rai amăng tivi hăng Anom git gai pơgang klin 3 boh tơring čar Phú Thọ, Sóc Trăng, Cà Mau. Bruă ngă anai kiăng pel ĕp, sem lăng, pơsur pran jua pơgang klin, laih dong pơhmư̆ lăng tơlơi pơgôp hiăp, tơlơi lăi glăi mơng hơdôm tơring čar anai kơ tơlơi pơtrun jăng jai dŏ hrŏm rơnuk rơnua, wai lăng klin kheng tŭ yua. pơhiăp ƀơi mông ngă bruă, Khua dêh čar ơi Phạm Minh Chính git gai tơring čar Phú Thọ, Sóc Trăng, Cà Mau dưi pơgăn tañ hơdôm anih hơmâo klin phrâo, gir ngă tui tơlơi pơgang klin hơmâo git gai mơng Kơnuk kơna hăng 3 mơta phun ngă gŏng tơmeh. Khua dêh čar ta lăi, lơ̆m ngă tui hơdră dŏ hrŏm rơnuk rơnua, hơdeč hmar pơgang klin, pơgang klin tŭ yua ăt khŏm kiăo tui djơ̆ tơlơi pơtô ba “5k+vắc xin+pơjrao tơlơi ruă + boh thâo măi mok hăng tơlơi thâo pơmin mă pô mơng mơnuih ƀon sang”. Khua dêh čar ta ăt kiăng hơdôm boh tơring čar anai ngă hrŏm kơjăp, tŭ yua hloh dong amăng ba čơkă mơnuih ƀon sang mơng tơring čar anai glăi pơ tơring čar pơkŏn pơhlôm rơnuk rơnua tui sang ia jrao pơtă hăng pơhlôm ba tơlơi hơdip mơda ƀong huă mơng mơnuih ƀon sang.

Siu H’Mai: Pơblang