VOV4.Jarai - Tlam lơ 6/12, ƀơi Ƀirô mă bruă, khua mir sir ơi Nguyễn Xuân Phúc tŭ jum Khua git gai pơ ala mơnuih ƀon sang dêh čar Lao Kaysone Phomvihane ƀrô hrơi ñu ba jơlan ƀing khua mua mơng Ƀirô Khua pơ ala mơnuih ƀon sang dêh čar Lao rai čuă sit nik dêh čar Việt Nam. Amăng mông bưp, Khua mir sir ơi Nguyễn Xuân Phúc lăng tôm hơdôm boh than ba glăi amăng jơnum bơkơtuai kơplah wah Khua git gai pơ ala mơnuih ƀon sang dêh čar Lao Kaysone Phomvihane hăng Khua git gai pơ ala mơnuih ƀon sang dêh čar Việt Nam ơi Vương Đình Huệ. Hăng pran khăp pap lơm dêh čar Lao glăk bưp tơlơi lông ră anai, biă mă ñu lĕ hơdôm tơlơi tơnap tap yua klin Covid-19, Khua mir sir ơi Nguyễn Xuân Phúc lăng yôm hơdôm anom bruă bơdjơ̆ nao mơng dua bơnah hơmâo gum hrŏm klă kjăp hloh amăng bruă pơgang klin hăng kiăng tŏ tui dong pơ anăp anai. Khua mir sir ăt pơsit tong hơdôm hơdră bruă rơđah rơđông mơng Việt Nam lĕ đing nao hăng pơđĭ kyar tơlơi rô nao rai ngă hrŏm giang mah kơplah wah Việt Nam - Lao. Dua boh dêh čar lĕ giang mah, gơyut gơyâo, “Ha asar braih pơpĕ pha, ha ară añăm pơđŏi ƀong hrŏm”. Khua mir sir rơkâo dua Ping gah, dua Kơnuk kơna hăng mơnuih ƀon sang pơtrut ngă hrŏm; gum hrŏm prap lui Jơnum pơbưp tui tơđar dua Ding jum kơđi čar hăng Jơnum tal 44 Jơnum min pơlir hơbit Kơnuk kơna Việt Nam - Lao.

Siu Đoan: pơblang