VOV4.Jarai - Mơguah lơ 23/9, Khua dêh čar ơi Phạm Minh Chính git gai mông jơnum hăng Anom git gai bruă pơgang klin kiăng pơtŏng glăi bruă pơhlôm pơgang klin amăng hrơi blan rơgao, biă ñu pơčrông lăng hơdră “pơgang klin lăp djơ̆ rơnuk rơnua, hơdeč hmar, dưi wai lăng klin Covid-19”. Pơhiăp ƀơi mông jơnum, Khua dêh čar ta kiăng kơsem min hơdră pơgang klin lăp djơ̆ rơnuk rơnua, tŭ yua. bruă pơgôp lăi nao hơdră pơgang klin lĕ tơlơi yôm phun ƀu dưi djưng djư, ngă rơnang dong tah yua dah ƀing ta ƀu hơmâo lu mông dong tah, tơlơi kiăng prong, bruă mă lu, tơlơi rơgơi ƀing ta tơdu mơn. Khua dêh čar črâo rơđah, hrơi blan rơgao, ƀơi hơdôm boh tơring čar, mlăm ngui ngor blan bơrơmi, mơnuih ƀon sang luh hyu ngui, nao rai ƀơi jơlan lu biă mă, amuñ hơmâo klin. Kiăng răng kơđiăng tui kơ tơlơi anai. Tui hăng tơlơi lăi pơthâo mơng Anom bruă git gai Dêh čar pơgang klin Covid-19, amăng dêh čar ta ră anai klin ưt tui laih; amăng 2 wơ̆t hrơi tơjuh giăm anai, mrô mơnuih ƀă klin amăng plơi pla hăng mơnuih djai aset tui laih. Ră anai, mrô vaccine hơmâo kah pơpha tlâ̆o lĕ rơbêh 50 klăk 200 rơbâo liêu, laih anun hơmâo tlâ̆o brơi rơbêh 35 klăk 100 rơbâo liêu.

Siu H’Mai: Pơblang