VOV4.Jarai-Amăng tal pơhiăp telephôn bơkơtuai hăng ơi Tedros Adhanom Ghebreyesus, Khua anom bruă Khul ia jrao rŏng lŏn tơnah WHO, tlam lơ 24/6, Khua dêh čar ơi Phạm Minh Chính pơdah pran jua bơni hăng lăng yôm bruă ngă hrom dua bơnah laih anun tơlơi djru yôm mơ̆ng WHO hăng bruă pơđĭ kyar ia jrao Việt Nam amăng 45 thun rơgao.

Khua dêh čar ơi Phạm Minh Chính mông dŏ bơkơtuai

Ƀơi anăp kơ klin kheng tơnap tap ƀơi hơdôm tơring čar, ƀôn prong amăng Việt Nam ră anai, yua djuai virus phrâo ngă, Khua dêh čar rơkâo anom bruă WHO djru hăng gleng rai kơ Việt Nam kiăng dưi tŭ mă djop ia jrao vaccine tŏ tui mơ̆ng hơdră bruă Covax kah hăng tơlơi ƀuăn laih, laih anun lăi amra pok pơhai bruă tlâ̆o ia jrao pơgang djơ̆ hăng tŭ yua, hmao kru hăng hơđong.

Laih dơ̆ng, Khua dêh čar rơkâo WHO djru Việt Nam jing sa amăng hơdôm anih dưi pơkra rai vaccine amăng kual yŭ ia rơsĭ Thái Bình Dương; lăi pơtong, anom bruă ia jrao Việt Nam ăt hơmâo lu tơlơi gêh gal yua lu sang bruă sĭ mơdrô dưi ngă bruă pơkra ming vaccine djơ̆ hnong jar kmar. Khua dêh čar hok mơak, tơlơi rơkâo mơ̆ng Khua anom bruă Khul ia jrao rŏng lŏn tơnah kiăng mơ-it ƀing mơnuih rơgơi kơhnâo mơ̆ng WHO djru Việt Nam amăng bruă anai.

Nay Jek: Pơblang