VOV4.Jarai-Tlam lơ 22/6, Khua dêh čar ơi Phạm Minh Chính hơmâo pơhiăp telephôn bơkơtuai hăng Khua dêh čar Đức yă Angela Merkel. Ƀơi mông bơkơtuai, dua čô khua dêh čar pơdah pran jua hok mơak kơ hơdôm boh tơhnal ngă hrom dơlăm tui dua bơnah dêh čar amăng 45 thun rơgao, yap mơ̆ng hrơi dua bơnah akŏ pơjing gơyut gơyâo pơtom hiăp.

Khua dêh čar ơi Phạm Minh Chính

Ơi Phạm Minh Chính lăi pơtong, Việt Nam lăng yôm bruă ngă giăng mah prong hăng dêh čar Đức, čang rơmang ngă kjăp tui tơlơi rô nao rai đăo kơnang mơ̆ng dua bơnah hăng ngă hrom lu mơta bruă. Khua dêh čar Đức yă Angela Merkel lăi lĕ, Việt Nam ăt jing bơnah ngă hrom yôm mơ̆ng dêh čar Đức, lăng yôm bruă ngă hrom Việt Nam hăng Đức laih anun lăi dua bơnah hơmâo lu tơlơi gêh gal prong, kiăng pơđĭ tui.

Kiăng ngă kjăp hloh tơlơi ngă giăng mah hiam klă dua bơnah, dua čô khua dêh čar kiăng tañ pơphun glăi khua mua dua bơnah čuă jơmư nao rai, bưp bơkơtuai ngă bruă hrom, pơđĭ tui boh tŭ yua mơ̆ng Jơnum min ngă hrom bơwih ƀong huă Việt Nam-Đức.

Nay Jek: Pơblang