VOV4.Jarai-Tlam lơ 19/7/2021, ơi Phạm Minh Chính Khua dêh čar hơmâo pơhiăp telephôn bơkơtuai hăng Khua mir sir dêh čar Philippines, ơi Rodrigo Duterte ƀrô hơdor glăi tal 45 thun hrơi akŏ pơjing bruă pơtom hiăp Việt Nam-Philippines lơ 12/7.

Khua dêh čar ơi Phạm Minh Chính lăi, Philippines lĕ bơnah ngă hrom yôm biă mă, đăo kơnang nao rai, kah pơpha lu tơlơi bơ đing nao hăng boh tŭ yua hăng Việt Nam; lăi pơsit, tơlơi ngă giăng pŭ ƀăn dua boh dêh čar ăt đĭ na nao, pơbŭ đĭ kjăp amăng 45 thun rơgao yap mơ̆ng hrơi dua bơnah ngă giăng mah sit nik.

Dua čô khua tŭ ư ngă hrom kjăp hloh pơtrut bruă ngă giăng mah Việt Nam-Philippines đĭ tui amăng djop bruă, pơtum nao hơdôm bruă yôm kah hăng: Pok pơhai ngă tui tŭ yua Hơdră mă bruă mơ̆ng thun 2019-2025, pơtrut bruă khua mua dua bơnah bưp nao rai, tañ pok pơhai tơlơi phiăn ngă hrom dua bơnah hơdeč hmar; pơphun jơnum hơdor glăi 45 thun ngă giăng mah; pơtrut kơtang hloh bruă ngă hrom pơgang tơlơi rơnuk rơnua; pơgang dêh čar, sĭ mơdrô tuh pơ alin; ngă gêh gal hăng pơtrut ƀing ngă bruă sĭ mơdrô dua bơnah tuh pơ alin amăng hơdôm bruă dua bơnah hơmâo tơlơi gêh găl.

Nay Jek: Pơblang