VOV4.Jarai-Tlam lơ 18/10, ơi Phạm Minh Chính Khua dêh čar bưp ƀing pơ ala ba gru hlâo gah bruă ia jrao nao ngă bruă pơgang klin Covid 19 pơ anăp adih. Mông bưp dưi pơphun mơ̆ng ataih đôč, lăng nao rai ƀuh ƀô̆ mơta amăng tivi. Jơnum hrom abih bang rơbêh 19 rơbâo čô mơnuih ngă bruă gah ia jrao ba gru hlâo hur har pơhlôm, pơgang klin covid 19 đơ đam dêh čar ta, gah bruă ia jrao mơnuih ƀôn sang, bruă ia jrao ling tơhan, kông an.

Ƀơi mông bưp nao rai, lu ơi ia jrao, nai ia jrao lăi pơthâo bruă mă lăp hơdor pioh, pran jua mơak hăng tơlơi tơnap tap hơmâo găn rơgao hơdôm blan rơgao. Lu tơlơi ră ruai hmư̆ pơmin ƀu anăm găn rơgao hĭ ôh, lơ̆m bong glăi pơkơdong hăng ayăt klin covid 19.  

Khua dêh čar ta ơi Phạm Minh Chính pơhiăp amăng mông bưp hăng lăi, Ping gah, Kơnuk kơna hăng mơnuih ƀôn sang hơdor tơngia biă mă bơni yôm kơ ƀing ngă bruă kơsung nao pơ anăp pơgang klin mơ̆ng mơnuih ngă bruă gah ia jrao, ling tơhan blah ngă hăng kông an yua kơ mơnuih ƀôn sang dêh čar, anun jing gru grua hiam klă, bruă mă lăp pơpŭ bơni prong biă mă laih anun gru grua hiam tơlơi găn rơgao klă kiăng pơđĭ tui, ngă tui dơ̆ng mơ̆ng anom bruă ia jrao, sa bruă mă pơyơr pran jua ƀu anet ôh amăng bruă pơgang klin, wai pơgang tơlơi suaih pral kơ mơnuih ƀôn sang yôm pơphăn biă mă.

Nay Jek: Pơblang