VOV4.Jarai - Tơdơi kơ nao pơ dêh čar Angle kiăng kơ jơnum khua mua tal 26 hơdôm boh dêh čar mut hrŏm tơlơi pơkôl Công ước khung mơng Sang gum hơbit djop dêh čar kơ bruă ayuh hyiăng pơplih sat laih dong nao čuă, mă bruă ƀơi dêh čar Angle, Khua dêh čar ta ơi Phạm Minh Chính hơmâo bưp Khua apăn akŏ Scotland yă Nicola Sturgeon. Yă Nicola Aturgeon pơdah đăo gơnang Việt Nam amra pơgôp pơphun hiam klă jơnum tal anai.

Khua dêh čar ta ơi Phạm Minh Chính bưp Khua apăn akŏ Scotland Nicola Sturgeon

Khua apăn akŏ Scotland hok mơ-ak hăng hơdôm tơlơi gum pơgôp mơng Việt Nam kiăng kơ gir run pơgang ayuh hyiăng pơplih sat, brơi thâo Scotland ƀuăn amra hrŏ trun pơđoh hyuh ngă sat truh thun 2045 hăng kơnong plơi prong Glasgow, anih amra pơphun jơnum khua mua COP26, ƀuăn amra hrŏ trun abih amăng thun 2030. Khua dêh čar ta ơi Phạm Minh Chính lăng yôm tơlơi rô nao rai hiam klă kơplah wah Việt Nam hăng Scotland, kual bơwih ƀong huă prong tal dua amăng dêh čar Angle ƀu djơ̆ kơnong tơpai whisky hmư̆ hing amăng rŏng lŏn tơnah đôč ôh mơ̆ wŏt lu tơlơi dưi amăng pơplih phrâo, bơwi ƀong mă yua boh thâo phrâo, prăk kak - hră pơhlôm nua mơnuih mơnam, pơkra hyuh gas, sit biă ñu pơđĭ kyar apui lơtrik pơkra glăi phrâo.

Siu Đoan: Pơblang