VOV4.Jarai - Ƀrô tal nao jơnum khua mua COP26, mă bruă ƀơi dêh čar Angle, Khua dêh čar ta ơi Phạm Minh Chính hơmâo mông bưp Khua čih pioh Sang gum hơbit djop dêh čar ơi Antonio Guterres. Amăng mông bưp, pơčrông sai hăng Khua čih pioh kơ tơlơi bơbeč kơtang lơ̆m ayuh hyiăng pơplih sat ƀơi dêh čar Việt Nam, Khua dêh čar ta lăi pơtong sa wŏt dong ƀuăn ngă hrŏm mơng Việt Nam amăng bruă pơgang ayuh hyiăng pơplih sat. Khua čih pioh Sang gum hơbit djop dêh čar lăng yôm tơlơi mut hrŏm mơng Việt Nam hăng hơdôm bruă amăng jar kmar, amăng anun hơmâo bruă pơgang ayuh hyiăng pơplih sat. Ơi Antonio Guterres brơi thâo amra djru brơi Việt Nam amăng bruă pơplih bơwih ƀong mơtah, lăp djơ̆, pơđĭ apui yua lơtrik pơkra phrâo, djru brơi Việt Nam hăng hơdôm dêh čar kual ia krông Mê Kông pơsir hĭ bruă lŏn tơhlŏm, ia mơsin ram hyu, pơplih phun pla, yua ia hơđong kiăng pơhlôm pla pơjing pơdai kơtor.

Siu Đoan: Pơblang