VOV4.Jarai - Amăng mông Jơnum COP26, Khua dêh čar ơi Phạm Minh Chính hơmâo mông bưp Khua mir sir ơi Joe Biden, Khua mir sir Hàn Quốc Moon Jae-in, Khua dêh čar Thái Lan Prayud Chan-o-cha, tŭ jum Khua git gai Keh prăk wai lăng ayuh hyiăng lŏn adai ƀơi rŏng lŏn tơnah. Amăng mông bưp hăng Khua mir sir dêh čar Mi Joe Biden, ơi Phạm Minh Chính Khua dêh čar ta lăng yôm biă bruă Khua mir sir ơi Biden ngă hrŏm kơtang hloh hăng Việt Nam wơ̆t hăng hơdôm boh dêh čar amăng kual ASIA, pơsit Việt Nam lăng yôm biă tơlơi rô nao rai hăng dêh čar Mi, čang rơmang pơđĭ kyar hloh, ngă hrŏm dlăm, hơđong kơjăp hloh.

Khua dêh čar ơi Phạm Minh Chính ƀơi mông Jơnum COP 26

Khua mir sir ơi Biden bơni mơn pran jua ngă bruă thâo pơmin mă pô, tơlơi ƀuăn kơjăp kơtang mơng Việt Nam ƀơi mông Jơnum COP26. Dua čô khua tŭ ư pơtrut tui tơlơi rô nao rai ngă gŏp abih bang bruă Việt Nam - Mi pơđĭ kyar klă hloh, amăng anun hơmâo ngă hrŏm gah prăk kăk pơkra boh thâo măi mok pơsir tơlơi pơplih ayuh hyiăng, biă ñu ngă tui djŏp tơlơi Kĭ pơkôl Paris, hok mơ-ak tơlơi gum ngă mơng hơdôm boh kông ti mơng čar Mi amăng bruă pơđĭ kyar mơtah, pơđĭ kyar hơđong ƀơi Việt Nam.

Siu H’Mai: Pơblang