VOV4.Jarai-Tlam lơ 1/11, ƀơi dêh čar pơtao Angle, Khua dêh čar ta ơi Phạm Minh Chính nao jơnum hrom hăng đĭ pơhiăp amăng mông Jơnum prong tal 26 mơ̆ng jơnum khua mua pơprong pơčrông sai kơ ayuh hyiăng, dưi pơphun amăng tal Jơnum 26 hơdôm bơnah kĭ pơkôl hrom sang gum hơbit djop dêh čar pơčrông sai bruă pơgăn anŏ pơblih ayuh hyiăng lŏn tơnah COP26. Khua dêh čar lăi pơtong, bong glăi hăng anŏ pơblih ayuh hyiăng, rŭ glăi lŏn glai hnong hnăi jing sa bruă mă gleng nao hlâo hloh amăng djop bruă mă pơđĭ kyar, jing tơhnal pơkă djơ̆ hăng pran jua tơlơi đăo kơnang pronh hloh mơ̆ng djop gưl, djop anom bruă, sang bruă bơwih ƀong huă sĭ mơdrô laih anun mơnuih ƀôn sang.

Khua dêh čar ta ơi Phạm Minh Chính đĭ pơhiăp amăng mông jơnum

Khua dêh čar ăt lăi, djop bruă ngă kơnang kơ lŏn glai adai rơhuông hăng lăng kơ ană mơnuih jing phun tong krah, ƀu lui hlơi dŏ glăi pơ klôn ôh. Pơđut tơlơi đĭ pơhiăp, Khua dêh čar ta lăi, Việt Nam hlăk gir run abih pran jua kiăng bong glăi hăng anŏ pơblih ayuh hyiăng rah hăng pơtrut bơwih ƀong huă rah kiăng hrưn đĭ, pơhlôm hơđong tơlơi hơdip mơda mơ̆ng mơnuih ƀôn sang jai hrơi klă hiam hloh. Việt Nam čang rơmang kơtưn ngă hrom jar kmar amăng lu hơdră, lu kơčăo bruă tuh pơ alin hăng pơđĭ kyar hơđong kjăp kơñ pơgi ni anăp.

Nay Jek: Pơblang