VOV4.Jarai-Tlam lơ 2/7, ƀơi anom bruă kơnuk kơna, Khua dêh čar ơi Phạm Minh Chính git gai jơnum lăng nao rai amăng tivi kơplah wah kơnuk kơna hăng khua mua djop tơring čar amăng dêh čar, kiăng pơtong glăi tơlơi bơwih ƀong huă mơnuih mơnam dêh čar 6 blan hăng anăp ngă bruă 6 blan rơnuč thun 2021, kiăng ngă tui djơ̆ tơhnal pơtrun dua bruă pơhlôm, pơgang klin rah hăng pơtrut bơwih ƀong huă mơnuih mơnam.

Pơhiăp ƀơi mông jơnum, Khua dêh čar ơi Phạm Minh Chính rơkâo, ƀing khua mua jơnum pơtum lăi nao kơ bruă pơdah thâo laih, ĕp hơdră, pơsir hơdôm tơhnal pơtrun djơ̆ găl. Hăng tơlơi pơtrun bruă ngă jai tơnap, gleh glar, hŭi rơhyưt, jai kơnang kơ abih bang ngă khua pô, djơ̆ tơlơi phiăn, pơtum abih tơlơi pơmin, pran jua, gơnam tam mă bruă lăp djơ̆ hăng tơlơi pơhing ră anai, lăi pơthâo hơdră pơsir ba glăi boh tŭ yua sit ngă tui.

Tơdơi kơ hmư̆ lăi pơthâo tơlơi pơhing bơwih ƀong huă kơ mơnuih mơnam 6 blan akŏ thun hăng akŏ bruă 6 blan rơnuč thun 2021, ƀing khua mua hơmâo pơčrông sai hrom, lăi nao boh tơhnal dưi ngă laih hăng hơdôm tơlơi tơnap tap, dŏ kơƀah kiăng pơsir hĭ hăng hơdôm tơlơi hrăm tui dơ̆ng. Kơ bruă mă pơ anăp, Khua dêh čar lăi pơtong, khom ngă tui tong ten dua bruă pơtrun hăng dua hơdră dăp hlâo pơtrut pơđĭ kyar bơwih ƀong huă đĭ mơ̆ng 6-6,5%.

Nay Jek: Pơblang