VOV4.Jarai - Tlam lơ 16/12, ƀơi Ƀirô Kơnuk kơna, Khua dêh čar ơi Phạm Minh Chính - Khua khul git gai dêh čar pơgang klin Covid-19 git gai mông jơnum lăng nao rai mơng ataih hăng 63 boh tơring čar, ƀôn prong kiăng kơ lăng glăi klin kheng hăng ba tơbiă hơdră bruă tong ten kiăng kơ plai ƀiă mơnuih ruă kraih, djai brŭ, pơtrut tañ bruă tlâ̆o vaccine, pơtrut klă dong bruă mă ƀơi hơdôm anih anom ia jrao ƀơi ƀon lan. Anai lĕ jơnum pơphun amăng hrơi blan djuai klin Omicron glăk lar hyu hơmâo WHO pơhŭi hlâo djuai klin anai glăk lar hyu kơtang hloh, aka ƀu thâo hiưm pă ôh, yua anun iâu pơthưr djop dêh čar tŏ tui kơđiăng, anăm pơtah tai. Khua dêh čar ơi Phạm Minh Chính lăi pơtong, ră anai, klin amăng dêh čar dŏ ngă tơnap tap; ƀơi sa, dua boh tơring čar, mrô mơnuih djai ăt dŏ lu mơn; yua anun djop ƀon lan, anom bruă kiăng tŏ tui lăng amăng đơ đam dêh čar kiăng kơ ba tơbiă hơdôm hơdră tong ten, sit nik kiăng kơ pơgang klin glăk lar hyu amăng mơnuih mơnam, sit biă ñu lĕ ƀing ruă kraih, plaih ƀiă mơnuih djai. Tui hăng Khua dêh čar ơi Phạm Minh Chính, kiăng kơ đing nao bruă tlâ̆o vaccine, pơtrut tañ bruă tlâ̆o vaccine kơ ƀing čơđai mơng 12 truh pơ 18 thun kiăng kơ ƀing čơđai dưi pơwŏt glăi nao sang hră. Djop tơring čar, ƀôn prong ngă tui hơdră pơgang klin lăp djơ̆, pơglôm bruă bơwih ƀong sĭ mơdrô.

Siu Đoan: Pơblang