VOV4.Jarai - Tlam lơ 24/5, ƀơi Sang bruă Kơnuk kơna, Khua dêh čar ơi Phạm Minh Chính git gai mông jơnum hăng Khua mua apăn bruă Kơnuk kơna kơ pơhlôm pơgang klin Covid-19. Pơhiăp ƀơi mông jơnum, Khua dêh čar ta lăi, rơwang hrơi tơjuh rơgao, klin ăt lar hyu kơtang mơn ƀơi lu anih, biă ñu lĕ sang măi pơkra gơnam. Kơnuk kơna, Khua dêh čar, Anom git gai pơgang klin Covid-19 dêh čar ta hơmâo git gai črâo bruă, hơmâo djŏp gưl ping gah, gong gai hăng mơnuih ƀon sang gum pơgang, gir khŏm dưi pơgang klin kheng.

Khua dêh čar pơhiăp ƀơi mông jơnum.

Khua dêh čar ta pơsit, bruă pơhlôm, pơgang klin Covid-19 hơmâo wai pơgang jing dưi pơphun truh kih lah hrơi plĕ hră ruah khua pơ ala mơnuih ƀon sang dêh čar tal 15 hăng khua pơ ala mơnuih ƀon sang djŏp gưl rơwang thun 2021-2026. Khua dêh čar ta kiăng pơkrem prăk kăk, ƀu dưi yua prăk ča čot ôh, pơƀut kơ jrao vaccine, iâu pơthưr arăng djru prăk, akŏ pơdong keh prăk vaccine. Ding jum, anom bruă gơnong dlông kiăng rơkâo đĭ akŏ pơdong keh prăk djru vaccine hluai tui tơlơi iâu pơthưr abih bang mơnuih ƀon sang gum djru, tơlơi djru mơng anom bơwih ƀong, anom bruă, mơng mơnuih mơnam, ƀing thâo pap djru brơi prăk, bruă iâu pơthưr pơdjru prăk kiăng ngă rơđah, lăi pơthâo tong ten, wơ̆t bruă pơgôp hăng bruă mă yua prăk.

Siu H’Mai: pơblang