VOV4.Jarai - Tlam lơ 24/10, Khua dêh čar ơi Phạm Minh Chính git gai mông jơnum mơng Khua mua apăn bruă Kơnuk kơna pơgôp hiăp kơ Jơlan hơdră hơkrŭ glăi hăng pơđĭ kyar bơwih ƀong huă - mơnuih mơnam. Khua dêh čar kiăng jơlan hơdră hơmâo lăi nao lu mơta bruă, ƀơi đơr hơr anih, hrơi mông sui, kiăo tui tơlơi pơtrun jơnum Ping gah dêh čar tal 13, kiăo tui Akŏ bruă pơđĭ kyar bơwih ƀong huă mơnuih mơnam 5 thun 2021-2025 hăng Jơlan hơdră pơđĭ kyar bơwih ƀong huă mơnuih mơnam thun 2022. Khua dêh čar ta kiăng pơtŏng glăi, him lăng hlâo khŏm djơ̆, kiăo tui tơlơi hơmâo sit, lăi tơpă, khŏm kiăng tui mrô jŭ yap sit. Jơlan hơdră kiăng pơƀut nao kơ hơdôm bruă yôm gơñăm nao sa, dua bruă tui glông jơlan: hơdôm bruă pơsir brơi gah ia jrao biă ñu lĕ tơlơi rơgơi mơng mơnuih mă bruă ia jrao lăi hrŏm, amăng anun lăng yôm kơ ia jrao pơhlôm pơgang hlâo klin duam ruă, ia jrao să, vắc xin hăng hơdră pơjrao tơlơi ruă; hơdôm bruă djru ba tơlơi hơdip ană mơnuih, jơlan hơdră djru prăk kăk, pơjing glăi anom bơwih ƀong, anom ngă ƀong hrŏm; pơhlôm hơđong kơjăp hơdră djru, wai lăng klă bruă arăng pơđĭ nua ča čot...Khua dêh čar kiăng Anom bruă git gai pơhmư̆ tơlơi pơgôp hiăp mơng ƀing khua laih anun tơña lăng dong kơ hơdôm anom bruă bơdjơ̆ nao kơ Jơlan hơdră hơkrŭ glăi hăng pơđĭ kyar tơlơi bơwih ƀong huă mơnuih mơnam, ječ ameč pơdah thâo kơ anom bruă prong dưi pơsir brơi tañ hloh tơdah dưi, biă ñu pơtă hlâo khŏm pơhlôm anŏ klă, dưi ngă, hơmâo abih bang mơnuih tŭ ư.

Siu H’Mai: Pơblang