VOV4.Jarai-Tŭ ư tơlơi jak iâu mơ̆ng Khua dêh čar Kur ơi Samdech Techo Hun Sen, lơ 9/9/2021, ơi Phạm Minh Chính Khua dêh čar jơnum hrom hăng đĭ pơhiăp ƀơi mông jơnum khua mua pơprong kual ia krông Me Kông pok pơhư prong iâu klah čun GMS tal 7, dưi pơphun lăng nao rai amăng tivi.  Jơnum hrom hơmâo Khua dêh čar Kur, Thai Lan, Khač Việt Nam, khua pơ ala gah dêh čar Myanmar, Khua anom bruă prăk pơđĭ kyar kual ASIA ADB; hăng giăm 350 čô khua pơ ala djop ding jum, anom bruă năm boh dêh čar, bơnah ngă hrom pơđĭ kyar laih anun khul sĭ mơdrô amăng dêh čar hăng gah rơngiao kơ kual.

Akŏ bruă jơnum, ngă kjăp tui tơlơi kơtang hrom bong glăi tơlơi lông lăng phrâo, jơnum anai lăi nao kơ bruă ngă hrom hơmâo pơdah thâo lơ̆m jơnum tal 6 hlâo pơphun amăng blan 3/2018 laih anun pơčrông sai ngă hrom rơnuk phrâo kah ră anai. Kơ anăp ngă bruă phrâo lĕ, jơnum anai hơmâo akŏ bruă bong glăi klin prong Covid 19 hăng rŭ glăi mơ̆ng črăn thun 2021-2023 laih anun không hơdră ngă hrom bơwih ƀong thun 2030.

Tui hăng anun, ƀing khua mua pơdah thâo bruă lăng nao pơ anăp adih truh thun 2030 kual mut hrom, hing ang hăng pơđĭ kyar kjăp hơđong. Pơđut jơnum, ƀing khua mua hơmâo pơsit tơlơi Pôr hrom mơ̆ng Jơnum anai tŭ ư jơnum tal 8 pơphun ƀơi dêh čar Khač thun 2024.

Nay Jek: Pơblang