VOV4.Jarai - Tlam lơ 5/9, Khua dêh čar ơi Phạm Minh Chính, Khua anom bruă git gai pơgang klin Covid-19 pơphun jơnum lăng nao rai amăng tivi kơ bruă pơgang klin covid-19. Mông jơnum hơmâo pơtruh nao rai hăng rơbêh 9.000 anih jơnum ƀơi hơdôm boh să, phường, tơring kual, tơring glông, plơi prong amăng dêh čar. Khua dêh čar ta lăi, mông jơnum phun ñu lĕ pơčrông sai bruă pơhlôm, pơgang klin ƀơi să, phường, tơring kual hăng lăi nao dlăm kơ bruă lơ̆m pơčlah mơnuih mơnam lĕ să phường tơring kual kiăng ngă hơget, mơnuih ƀon sang kiăng ngă hơget. Lăi glăi ƀơi mông jơnum, Khua ding jum ia jrao ơi Nguyễn Thanh Long brơi thâo, klin ră anai kơtang biă, klin tal 4 pơphun mơng lơ 27/4/2021 truh lơ 5/9/2021, čih pioh hơmâo rơbêh 520 rơbâo čô mơnuih ƀă klin, giăm 289 rơbâo čô mơnuih suaih laih (55%) laih anun giăm 13 rơbâo čô mơnuih djai; dêh čar ta hơmâo tlâ̆o rơbêh 21.500.000 liêu vaccine, hơmâo giăm 30% mrô mơnuih mơng 18 thun truh kơ lu hloh. Bruă pơphun ngă ăt jing bruă yôm phun mơn, biă ñu lĕ ƀơi hơdôm kual plơi pla. Ƀơi mông jơnum, Khua dêh čar kiăng pơtruh nao rai hơdeč hmar hăng lu khua mua să, phường, tơring glông hơmâo klin kơtang. Ƀing khua amăng kơnuk kơna ăt krăp lăng pô ngă khua ƀơi kual plơi pla thâo hluh dơ̆ hơpă kơ klin kheng, hơdră pơgang klin, tơlơi git gai črâo bruă mơng Gơnong dlông laih anun hơmâo tơña na nao kơ bruă pơjrao mơnuih ƀă kman F0, bruă ia jrao, pơčrang kman, pơhlôm djru mơnuih tơnap tap.

Siu H’Mai: Pơblang