VOV4.Jarai-Lơ 19/5, Khua dêh čar ơi Phạm Minh Chính hơmâo mông mă bruă hăng Ding jum Bruă mă Tơhan rơka hăng Mơnuih mơnam. Pơhiăp đĭ amăng mông jơnum, Khua dêh čar ơi Phạm Minh Chính lăi pơtong, brơi khom ngă tui djơ̆ tơlơi kiăng pơtrut bơwih ƀong huă pơđĭ kyar nao hrom hăng bruă pơđĭ tơlơi thâo rơgơi laih anun bơkơnar mơnuih mơnam, ƀu ngă rơngiă hĭ tơlơi thâo rơgơi hăng bơkơnar mơ̆ hang kơ kiăng pơđĭ kyar sa hnong bơwih ƀong huă, khom gleng nao hloh dơ̆ng kơ mơnuih ƀun rin, mơnuih ƀu ai buai amăng mơnuih mơnam.

Khua dêh čar ăt lăi rơđah, Ding jum anai ăt dŏ hơdôm khul bruă aka ngă klă. Anih nao mă bruă apah lu samơ̆ aka ƀu bơkơnar, mơnuih mă bruă aka thâo bruă phrâo hruaih ôh, kơƀah anŏ pơtô hrăm sa dơnuai. Boh tơhnal mă bruă mơ̆ng Việt Nam dŏ aset, tơlơi anai kơnang kơ lu mơta samơ̆ amăng anun tơlơi glăm ba phun lĕ mơ̆ng Ding jum, boh nik amăng bruă pơtô hrăm bruă mă yua dah ană mơnuih thâo rơgơi, hơdeč hmar kơ bruă, kơhnăk lĕ jing anŏ pơsit boh tŭ yua bruă mă.

Khua dêh čar pơtrun hiăp kơ Ding jum Bruă mă, Tơhan rơka hăng Mơnuih mơnam ăt ngă klă amăng bruă mă, tơlơi dưi mơ̆ng pô, pơtum ngă tui Hră pơtrun mrô 42/NQ-CP kơ lu hơdră djru mơnuih ƀôn sang tơnap tap yua klin Covid 19, hơduah ĕp hơdră djơ̆ găl djru mơnuih ƀôn sang pơ anăp anai.

Nay Jek: Pơblang