VOV4.Jarai-Lơ 27/6, Khua dêh čar ơi Phạm Minh Chính hơmâo nao mă bruă hăng khua mua ping gah tơring čar Đồng Nai kơ bruă pơhlôm pơgang klin Covid 19 hăng tơlơi pơhing pơđĭ kyar bơwih ƀong huă mơnuih mơnam, pơgang tơlơi rơnuk rơnua dêh čar amăng 6 blan akŏ thun 2021, pơčrông bruă mă 6 blan rơnuč thun 2021 dơ̆ng.

Khua dêh čar ơi Phạm Minh Chính mă bruă hăng khua mua ping gah Đồng Nai

Laih hmư̆ tơlơi lăi pơthâo mơ̆ng khua mua tơring čar Đồng Nai hăng tơlơi pơgôp hiăp mơ̆ng lu ding jum, anom bruă, Khua dêh čar bơni kơ boh tơhnal tơring čar Đồng Nai dưi ngă laih, tơlơi pơhing klin kheng dưi pơgăn ding dăng, tơlơi bơwih ƀong huă jăng jai hơđong mơ̆n, ngă tui lu bruă djru mơnuih mơnam tŭ yua klă.

Khua dêh čar lăi pơtong, Đồng Nai hơmâo anih dŏ yôm biă mă amăng kual laih anun amăng dêh čar ta, yua anun khom khut khăt amăng bruă mă kơtưn ngă giong mơdua bruă jao.

Ră anai, tơlơi pơhing klin kheng tơnap tap biă mă, tơring čar khom pơtong rơđah, tơlơi gơgrong mă bruă bong glăi hăng klin hŭi amăng mông tơnap hloh. Đồng Nai kiăng ngă hrom djop anom bruă, ding jum gơnong dlông pơsir jơlan hơdră, tơlơi dŏ gun kiăng pơtrut pơđĭ kyar bơwih ƀong huă.

Nay Jek: Pơblang