VOV4.Jarai-Ƀrô djơ̆ hrơi pioh kơ mơnuih ngă bruă sĭ mơdrô Việt Nam lơ 13/10, Khua dêh čar ơi Phạm Minh Chính phrâo mơ-it hră bơni h’ơč kơ ƀing ngă bruă sĭ mơdrô amăng dêh čar. Amăng hră mơ-it čih lĕ Khua dêh čar pơdah pran jua thâo hluh tong ten, pap hrom, pơđing hmư̆ hăng ăt hlăk hơduah ĕp jơlan hơdră djru kơ mơnuih ngă bruă sĭ mơdrô găn rơgao tơlơi tơnap tap, hrưn nao pơ anăp lu hloh laih anun hlăk pơkra hơdră rŭ glăi, pơđĭ kyar bơwih ƀong huă mơnuih mơnam dêh čar, dưi bong glăi rơnuk rơnua, beč bal, pel ĕp tŭ yua klin covid 19.

 Laih dơ̆ng, pok pơhai lu hơdră ia jrao pơgang djơ̆ lăp, hơđong, gêh găl, tŭ yua, boh nik ñu bruă blơi ia jrao vaccine, djru kơ anom bruă sĭ mơdrô, mơnuih ngă bruă sĭ mơdrô tañ rŭ glăi bruă mă, sĭ mơdrô, pơkra  ming ba tơlơi hơdip mơda pơwơ̆t glăi kah hăng tơđar. Kơnuk kơna hăng djop sang bruă hơmâo tơlơi dưi amra pơtrut pơblih tơlơi phiăn mă bruă, pơsir hĭ tơlơi tơnap tap, gun gan, pơtum lu bruă mă pran jua, pơblih hơdră ngă hră pơar…ngă gêh găl kơ bruă sĭ mơdrô amuñ hloh, bơkơnar pioh kơ ƀing ngă bruă sĭ mơdrô pơđĭ kyar hăng mut phung jar kmar.

Ƀrô djơ̆ tal anai, Kơnuk kơna hăng Mơnuih ƀôn sang Việt Nam ăt čih pioh hơdor na nao tơlơi djru ba, gum hrom mơ̆ng ƀing ngă bruă sĭ mơdrô dêh čar ta hăng mơ̆ng dêh čar tač rơngiao djru hrom pơtrut pơđĭ kyar bơwih ƀong huă mơnuih mơnam Việt Nam ăt kah hăng bruă pơhlôm, pơgang klin.

Nay Jek: Pơblang